Es is werklich schlimm, wann jemand zu unfreindliche Zeide schaffe muss. Midde in der Naachd odder an Feierdaache: in Krankeheiser, bei der Feierwehr odder sunndaachs in de Redaggzioone, woose die Zeidung fier de Moondaach sesammebossele. Unn richdisch stressisch werrds dann in de Geschäffde, wo mer midd fremde Leid se duun hadd. Also ich hann greeschdes Verständnis for jeeder wo saad: das wär nix fier mich. Awwer was ich nidd verstehn iss, dass jemand, wo sich freiwillisch fier e Dienschd-leischdungsberuuf entscheide duud, so krimmelwiedisch guggd, wammer ebbes bei ihm inkaafe will. Wann ich kää Bluud siehn kann, doo schaff ich joo aach nidd ausgerechend in der Unfallklinigg. Vielleicht leids awwer aach nur an dem saumääsische Wedder zur Zeid. Odder hann sie schunn mool oowends die Unverfrorenhääd gehadd, fier noch e paar Breedcher käuflisch se erwerwe. Doo kinne sie ebbes erlääwe. Wiese im Fernsehn graad vor drei Daach midd me treffende Versprecher gesaad hann: Ihr Sörwies wäär exdra doodevor doo, fier de Leid midd Rat unn Tat beiseide se stehn. Das kennd mer joo, wammer irjendwoo e Auskunft hann will. Kaum iss mer in der Dier drinn - schwubbs, iss känner meh doo. Es beschde Beispiel iss joo e bekanndes Transportunnernehme uff Schiene, wo de Ex-Scheff jedds konsekwenderweis inn Fluuchzeiche macht. Weil sei friejere Kunne manchmool aach am liebschde in die Luffd gang wääre. Zum Gligg sinn das awwer nur Einzelfäll unn die meischde Geschäffde bei uns wisse, dass e guddi Bedienung die beschd Reklame iss. Wammer nämlich e freindliches Gesicht vor sich hadd, doo geht, bildlich geschwäddsd, die Sunn uff. Unn dann klabbds aach ball widder middem Wedder.