....Was mer nidd im Kobb hadd

....Was mer nidd im Kobb hadd

Wammer allmählich inn e gewisses Älder kummt, doo kried mer so langsam Probleeme middem Gedächtnis. Unn es kann passiere, dasse emm zum Geburtsdaach Vergissmeinicht schenge odder e Ständche bringe middem Titel: Wo hann isch dann bloos mei Kobb. Awwer das passiert nadierlich aach de Jingere, dass die schunn mool vergesse, woose ihr Audo geparkt hann. Wie gudd dasses doo es Händi gebbd

Wammer allmählich inn e gewisses Älder kummt, doo kried mer so langsam Probleeme middem Gedächtnis. Unn es kann passiere, dasse emm zum Geburtsdaach Vergissmeinicht schenge odder e Ständche bringe middem Titel: Wo hann isch dann bloos mei Kobb. Awwer das passiert nadierlich aach de Jingere, dass die schunn mool vergesse, woose ihr Audo geparkt hann. Wie gudd dasses doo es Händi gebbd. Nidds es eichene, nää das vun annere Leid. Wie ich nämlich neilich midd der Eisebahn gefahr bin, doo hadd so änner im Abteil gehuggd. Wo unner reecher Anteilnahme vun de Mitreisende midd dehemm telefoniert hadd: Ich hugge jedds im Zuuch noo Frankfurt. Doo hadd mer richdisch gemerkt, wie die all erleichtert waare, dasse jedds widder genau gewissd hann, wo se ware. Das bleede beim Vergesse iss joo nur, dass ausgerechend Sache, wo uns uff de Wegger gehn, dass die emm partout nimmeh ausem Kobb gehn. Es gebbd awwer aach masseweis Empfeelunge, wie mer sei Gehernschmalz widder uff Trabb bringe kinnd. Mer sollt meeschlichst vill Kreizworträätsele leese odder am beschde glei Chinesisch leere. Schwäär aanreeschend fier die graue Zelle iss aach noch, wammer e guddes Buch lääsd. Unn doo sinn joo in Dengmerd die Lääseradde unn Biecherwermer midd Biblioteege unn Buchhandlunge gudd versorscht. Mer muss nadierlich beim Lääse schunn e bissje Geduld middbringe. Neilich hann ich nämlich erlääbt, wie doo e Fraa e Buch serigg gebrung hadd: Das doo Buch hann sie awwer schnell ferdisch gehadd. Nää, dass hann ich iwwerhaupt nidd gelääs. Ich hann in das Buch hinne nin geguggd unn doo hann ich gesiehn, dass die Hauptperson doo sterbt. Also wisse se, so ebbes lääs ich grundsetzlich nidd!

Mehr von Saarbrücker Zeitung