Es sieht jedds alles so scheen uffgeraumt unn iwwersichtlich aus. E Friehjohrbudds im Herbscht sosesaan. Unn die Macher sinn ganz stolz, dass die Seit so beniddserfreindlich iss. Also dass mer sich doo schnell serecht find unn beim Söörfe midd ganz weenisch Kliggs an all Informazioone kummt. Annererseits zeid sich die Beliebthääd vunn soome Web-Ufftridd doodraan, ob aach vill Leit die Seit aankligge. Das iss nämlich heidsedaachs kää Kunschstigg meh, fier das genau se messe. Unn als beschde Klicks-Bringer erweist sich nääwe rer problemlos Navigazioon e Seit midd meeschlichst scheene Foddoos. Die sinn das, was em seerscht aanlacht, wammer sich iwwer das, was hie so abgeht, informiere will. So e Bild saad joo bekanntlich meh wie ganz vill Werder. Ich saan als im Spass: Es Au lääst joo aach midd! Unn weil unner de Kommune die Konkurrenz groos iss, doo zeid mer sich uff so rer Webseit am beschde vunn seiner Schoggolaade-Seit. Wobei es aach nidd unbedingt schaade duud, wann e paar Prallinees debei sinn. Heit macht mer nämlich Werbung nimmeh middem Holzhammer unn mer duud aach nimmeh die Trommel riehre wie beime Feldzuuch. Mer duud doo die Zielgruppe eejer umschmeichele. Wie gesaad midd Bilder odder aach midd uurische Sprich wie: Dengmerd - echt gudd! Was an de ursaarlännische Wahlspruch erinnert: Mir wisse was gudd iss. In rer hiesisch Kneip hann ich sogar gelääs: Es heegschde im Lääwe was ääner werre kann iss Saarlänner.