Noo dem Moddo: Was fiehrt Dengmerd im Schilde? Wo mir joo sosesaan es Infallsdoor fier die Biosphäre sinn. Als erschdes denkt mer doodebei nadierlich an de Stiwwel, obwohl der joo sicher nidd es äänzische Wahrzeiche vunn Dengmerd darstellt. Sie hann jedds zum Beispiel direggd in dem seiner Näh noch e ganz neijes Monnument uffgestellt.Fier die ganz Werbe-Akzioon losse se aach richdisch ebbes springe unn nidd se knapp. Uff Neideitsch saad mer in some Fall, die Verantwortliche hädde Geld in die Hand genomm. Im Geejesatz zu den Verfahre, wammer es Geld an der Hand nemmt. Dass es emm nidd am Enn noch fortlaaft.Awwer in der Brangsche geheert joo es Klabbere zum Handwerk unn zum Erfolgsrezept. Unn das gebbds nidd zum Nulltarif. Friejer iss joo aach schunn fier Dengmerd geworb worr, indemm dass prominende Innwohner sich schwäär positief iwwer die Stadt geäußert hann. Awwer denne ihr Bilder hann e bissje verschdeggeld im Rathausflur gehong.Werbemääsisch nidd so gudd iss, dass sich uff Dengmerd leider nix so richdisch reime duud. Heegschdens so halb verungliggder Kalauer wie zum Beispiel: Wanns mool eng werrd, kumm noo Dengmerd!Desweeje solle jedds unser Schoggoladeseite joo aach gudd sichtbar uff die Schilder druff. Wobei die greeschde Dengmerder Pluspunkte joo optisch nur schwäär darstellbar sinn: mir hann nämlich nidd nur die Bio- mir hann aach e ganz spezielli Atmo-Sphäre. Also guddi Luft unn furchtbar nedde Leit.