Mundart-Kolumne für St. Ingbert Huggener gudd?
Vor korzem hann ich e inderessander Ausdrugg gelääs. Sie hädde nämlich feschdgeschdelld, dass in der Fuusgängerzoon es „Stadtmobiliar“ nimmeh so richdisch in Schuss wär. Also es gehd doo anscheinend um Meewel, die wo uff der Stroos stehn.
Das kennd mer joo vumm Sperrmüll. Odder vunn Fernsehkomödieje, wo er nääwenaus gang iss unn ääs ihm dann sei ganzes Gelummbs vor die Dier stelld.
Awwer in dem schbezielle Fall isses um die edelstäälerne Bänk gang, wo in der Stadt stehn unn die wo jedds ab Friehjohr widder häufischer beniddsd werre. Unn weil die Fuusgängerzoon bekanndlich die gudd Stubb vunn Dengmerd iss, geheere die Siddsgeleechenhääde logischerweis zum Mobiliar.
Awwer jedds hadd de zustännische Beiraad monierd, die wäre nidd senjooregerechd. Noch so e scheeni Vokabel. Awwer es iss joo halt mool so, dassmer sich ab me gewisse Älder effder mool hinsiddse muss, awwer doodefier nimmeh so gudd unfallfrei widder hochkummd. Solang bisse denne Umbau vunn de Siddsmeewel hinkried hann, kammer sich joo midd der Ausebestuhlung vunn de gaschdronoomische Lokalidääde behelfe. Unn vunn dort aus bedrachde, wie die Innestadt langsam widder ausem Winderschloof erwachd. Dass iss äänfach ääns vunn de scheenschde Hobbies: Hugge unn gugge und ab unn zu schlugge. Dass de Friehling vor der Dier stehd, merkt mer aach doodraan, dass am Samschdaach Naachd die Uhre uff Summerzeid umgestelld werre. Unn doo kumme aach dehemm die Garniduure fier de Gaarde aus der Versenkung. Das iss iwwrischens e guddi Eselsbrigg, wammer sich nimmeh richdisch im Klare iss, wie rum die Uhr gestelld werrd. Die Meewel kumme jeddsd vor die Verandadier unn desweeje werre die Uhre im Friehjohr aach vorgestelld.
