Fier e paar derardische Gewächse iss jedds graad die beschd Zeit: de Bärlauch, die Brennessele unn de Bettsäächer. Der heischt joo eichendlich Leewezahn, awwer das war uns friedliche Saarlänner zu marzialisch. Unn die entwässernde Wirkung iss dann e gudder Aanlass fier die Flissischkääd hinnerher noosefille. Unn Brennessele als Tee unn fier ganz hartgesottene sogar als Salat soll joo es Blut reinische.Die Zutaade kumme aach graad recht fier de neieschde Ernährungtrend. Die Wissenschaftler, wo mer immer devunn lääst, dass die ebbes streng wissenschaftlich rausgefunn hädde, hann jedds widder ebbes feschdgestellt. Am gesündeschde kinnt mer sich ernähre, wammer jede Daach nidd nur 5 sondern 7 bis 8 Porzioone vun Obst unn Gemies vezehre werrd.Das fiehrt allerdings im Haushalt zu kläänere organisatorische Umstellunge. Bis mer nämlich jede Daach die unnerschiedliche Zutaade unn Grundnahrungsmiddel all beisamme hadd, iss de halwe Daach rum. Die solle nämlich aach all meeschlichst frisch sinn unn im Idealfall sogar biodinnamisch.

Also macht mer sich morjens schunn dinnamisch unn gudd gelaunt uff die Inkaafstuur, am beschde midd schunnemool em Abbel im Handschuhfach. Wann dann graad kää Umleidung iss unn mer e Parkplatz kried, unn wammers Gemies gebuddsd unn geschnidd hadd, haddmer bis middaachs schunn e klääner Dääl vun seinem Ernährungsplan abgehakt. Nur im Fall, dass mer noch e beruflichi Nääwebeschäffdischung hadd, kanns sinn, dasses zeitlich e bissje eng werrd.