Was macht mer, wann drause so Suddelwedder iss unn mer kää Luschd hadd fier sich das aanseduun? Mer bleibt am beschde gemiedlich dehemm unn gönnt sich ebbes Guddes. Bei der Gourmet-Mess hadd mer sich joo kinne e paar Anreechunge holle, wie mer durch de gezielde Innsatz vun kaloriejehaldischem Edel-Schnääges die Produktion vun Gliggshormone aankurwele kann. Unn wammer dann runderum satt unn sefriede iss unn mer huggd in freehlicher Runde beisamme, doo kammer dann mool de Fernseejer auslasse, wo sowieso nix Rares kummt. Unn vielleicht nochmool ääns vun denne alde Spiele ausem Schrank erauskraame, wo mer friejer sich die Zeid demidd vertrieb hadd. Ich menn nidd so Spiele uffem Kommbjuuder, nää so richdische midd Bredder unn Figuure unn Nuppsies zum Aanfasse. Im Gau solls e Famije genn, wo iwwer 150 vun denne Spiele in Gebrauch hadd. Unn in Dengmerd hadd sich jedds sogar e Grupp sesammegeschloss, wo sich rechelmääsisch zu so Spieloowende im Café treffd. Mer leid also doodemidd direggd im Trend. Unn das iss joo aach kää Wunner: Wammer nämlich zum Beispiel Mensch-Ärjerdichnidd spielt, doo iss das e ziemlich guddi Iewung falls mer graad die neieschde Nachrichde geguggd hadd. Unn wer beim Monopoly pleddslich so e gierisches Flaggere in die Aue vun seine Middspieler sieht, der begreift ganz plasdisch, wie unser Wertschafft funktioniert. Unn dann gebbds joo aach noch die ville Kaardespiele. Die ganz Hartgesoddene duun sich dann beim Pokere de leddschde Schliff beibringe. Wie mer am beschde sei Middmensche durch Bluffe verblüfft. Doo kummts dann uff zwää Sache aan: Wie macht mer e meeschlichst unschuldisches Gesicht unn fier wie bleed halt mer sei Geejespieler.