Odder wie se im Amtsdeitsch hääscht: die Lichtzeichenanlage. Unn so e Reechelung iss beim heidische Verkehr dringend needisch, aach wanns de Verkehrsteilnehmer meischdens nidd in de Kram passt. An so rer Ampel sinn die nämlich die meischd Zeit all imme hochgraadisch aangespannde Zustand.
Die Fuusgänger sinn all in Lauerstellung, soosesaan in de Startlecher, dasse noch heil iwwer die Stroos kumme bisses widder rot werrd. Uff der Geejeseid die Audofahrer, wo sich ihr Kupplung ruiniere, dasse kää Mikro-Sekunn verliere, bevor se losbreddere. Weil sunschd de Hinnermann garandierd uff die Huub driggd. Doodezu gebbds e kloori jurisdischi Erläuterung. „Das grüne Lichtsignal erlaubt zwar die Weiterfahrt, verpflichtet aber nicht dazu.“ Annerererseits derfd mer de Verkehr nidd unneedisch uffhalle. Wer hädd das gedenkt! Wie mer sieht, iss die Sachlaache an der Ampel einichermaase uniwwersichdlich. Desweeje dient die joo aach manchmool als Simbool im boliddische Lääwe. Das hadd sich awwer nidd bewährt, weil doo die Beleuchdung dauernd wechseld unn dann woomeeschlich noch e Diskussioon doodriwwer losgeht, welli Farb noo owwe unn welli noo unne gehehrt. Uff der Fußgängerampel iss noch zusäddslich e Määnje uffgepixeld, mool midd unn mool ohne Hudd. Unn in Dengmerd hannse jedds vorgeschlaa, denne zur Erinnerung durch e Berschmann se erseddse. Sinnischerweis bei de Ampele in der Kohlestroos.