Mundart-Kolumne: Radler uff grooser Tuur

Mundart-Kolumne : Radler uff grooser Tuur

Seit voorische Samschdaach isse in Dengmerd widder am Rolle, die Akzioon Stadtradeln. Graad noch rechtzeidisch fier sich vor der Tuur de France in Schwung se bringe. Obwohls bei der Fahrradtuur e bissje gemiedlicher zugeht.

Mer will joo nidd, dass die waggere Teilnehmer hinnerher gerädert sinn.
Das Ganze iss in erschder Linie fier e gudder Zwegg. Dassmer gewissermaase sei Energie uff die Pedale iwwertraad fier doodemidd global Energie se spare. Die Fortbeweechung uff zwää Räder iss iwwerhaupt ganz nadierlich. Weil de Mensch joo aach zwää Bään hadd unn kää vier. Sie kenne denne dumme Spruch: Wann mei Oma Räder hädd, wär se e Omnibus.
Auserdem gebbds doo e edler Wettstreit zwische de Kommune, wo die meischde Kilomeedere sesammekumme. Sosesaan e Kampf der Waden und Gelenke, wies beim Schiller hääscht. Odder so ähnlich. Unn es solle joo Anreize geschaff werrde, fier sei Drohtesel mool aus der Garaasch se holle. Wo e Wille iss, iss aach e Radwää.
Friejer hadd mer als beese Widdse gemachd iwwer die Radfahrer. Die woo noo unne trääde unn noo owwe e Buggel mache. Awwer die Zeide, wo de Velozipeed-Besiddser Fahrradspange an de Hoose stegge gehadd hadd, die sinn schunn lang vorbei. Heid traad de Sportsfreind uff seinem Luxus-Baik als Staduss-Simbool e gesteildi Kluffd. Midd me hautenge Leibche unn rrer lilaa Strambelbux.
Awwer äänzelne Hüpperaggtiefe, die sause midd Karacho iwwer die Pischde – so schnell kannschde garnidd gugge. So jemand werrd mer gääre zurufe: Radl verpflichtet. Nämlich zume behutsamere Umgang midd de Verkehrteilnehmer am unnere Enn vunn der Haggordung. Wann schunn kää Rigglicht, dann weenischdens Riggsicht.

Mehr von Saarbrücker Zeitung