Mundart-Kolumne "Aufgepickt"

Mundart-Kolumne : Nur nidd verzeddele!

Morje iss joo die Abschlussgala vunn der Dengmerder Pfanne. Noodemm das Programm iwwer die Biehn gang iss, tagt dann noch es groose Pfannengericht. Woose die Küchegerääde an die Beträäch verdääle, wo der Jury besonnerschd gudd gefall hann.

Unn weil das so e komblizierdes unn heikles Amt iss, hann die heid e ganzer Daach Zeit fier sich se entscheide.
De Kollumnischd vunn denne Zeile hadd vor Johre joo mool die Ehre gehadd, in soome Gremium middsewirke. Ich kann ihne saan, das iss kää Zuggerschlegge. Das fangt schunn bei der Vorauswahl aan, wann die Bewerbungsvideos gesichded werre. Es gebbd nix was emm stimmungsmääsisch meh enunnerzieht wie wammer zirka 280 luschdische Videos hinnerenanner guggd.
Wann dann e Kandidat erauskummt, wo mer vorher nidd gedenkt hadd, dasser gewinnt, doo saad mer umgangssprachlich: denne odder die haddmer nidd uffem Zeddel gehadd. Uff so Zeddele schreibt mer nämlich alles uff, was mer sunschd in seinem verpeilde Kobb gääre vergessd. Bleed iss nur, wammer dann die Zeddele nimmeh find. Friejer hannse doodefier e Eselsbrigg benuddsd. Awwer bei de Brigge wääs mer joo neijerdings nimmeh ob die halle.
Dass das midd der Zeddelwerdschaffd endlich uffheert, desweje hadd joo e schlaues Kerlche so Schnibbsel erfunn, wo mer iwwerall draanbabbe kann. An die Wand, an de Kommbjuuder unn sogar an de Kiehlschrank. Apropos, graad hannse uff der Eleggdroonigg-Mess so e Schrank vorgestellt. Wo Foddos vunn seim Innelääwe macht. Unn dann uffem Händi aanruft wanner Nooschub braucht. Unn der warnt emm aach, wann die Worschd unn de Kääs im falsche Fach leije. Das hadd mir graad noch gefäähld: so e unnerkiehldi Abbaraduur, wo mich uff Vordermann bringt.