Uff der Audoausstellung in Frankfurt haddmer sich neilich kinne e scheenes Bild devunn mache, wie die Audos in Zukunft funkzioniere solle. Dass die eleggdrisch fahre iss joo inzwische schunn e alder Hudd. Das sieht mer schunn an de Karosserie, die wo stromlinjefermisch iss. Awwer ball fahre die Audos ganz vunn allään. Also gewissermaase audo-maadisch. Was bei der Entwigglung im Endefeggd erauskummt, wääs mer allerdings noch nidd so genau. Wahrscheins e ganzi Armada vunn Geischderfahrer. Wann emm nämlich so e Abberaad entgeejekummt, mennt mer, der wär wie vunn Geischderhand gesteuert. Odder mir sinn dann all nur noch lässdische Beifahrer. So ääner wo joo gääre demm, der wo am Steier huggd, Aanweise gebbd: Fahr langsamer! Gugg noo vorre! Unn dann kummt bestimmt wie beim Navi e Stimmche ausem Armaturebrett : Hall dei Klabb unn entspann dich! Awwer uff der Fachmess hannse gesaad: Die Fahrzeuge kommunizieren mit der Infrastruktur. Was uff deitsch hääscht, dem Audo sinn die Beifahrer schnubbe, das unnerhalt sich liewer middem Stroosebelaach. Desweeje isses aach noch iwwerhaupt nidd ausgemacht, ob sich de einheimische Audofahrer dann es Steier aus der Hand nemme loost. Awwer mool ganz ehrlich, so wie manche im normale Lääwe fahre, doo kann e Audomaad aach nidd vill meh kabudd mache.