Slalom durch die Buggelpischde

Slalom durch die Buggelpischde

Aach wanns metereologisch unn stimmungsmääsisch schunn langsam Friehjohr werrd, doo lasst uns de Winter noch nidd so ganz los. Mer saad joo in soome Fall aach gääre: es digge Enn kummt hinnerher odder abgerechend werrd am Schluss. Unn die Abrechnung iss ganz scheen gepeffert

Aach wanns metereologisch unn stimmungsmääsisch schunn langsam Friehjohr werrd, doo lasst uns de Winter noch nidd so ganz los. Mer saad joo in soome Fall aach gääre: es digge Enn kummt hinnerher odder abgerechend werrd am Schluss. Unn die Abrechnung iss ganz scheen gepeffert. Doo sinn nämlich die Schlaachlecher, wo iwwerall die Verkehrsaadere ziere fier die Stadtsäggel-Beauftraachde e ziemlicher Schlaach ins Kondoor. Mir hädde joo sogar zwää Wintere gehadd, hannse gesaad, die wo härder ware wie de verschammerierde Stroosebelaach. Awwer weeje de Lecher im Haushalt hääde se halt kinne nur e paar Stroose in der Stadt notderfdisch fligge. Doodefier stehn awwer jedds iwwerall in denne annere Stroose die Schilder, wo scheen deitlich druffsteht, dass die Fahrbahn beschäädischt iss. Fascht so, wie mer das aach bei Sehenswirdischkääde macht. Allerdings hann die Audofahrer mittlerweile aach schunn längscht gemerkt, dass doo die Stoosdämpfer getestet werre. Awwer vielleicht iss das joonidd unbedingt e technisches Probleem unn eejer e jurisdisches. Dass die Audofahrer wo doo trotzdem durchbreddere hinnerher die Gemeinde nidd noch verklaache. Das ganze iss hald e tipischer Fall vunn heejerer Gewalt. Unn geeje die Innwirgung vunn der Naduur issmer sowieso machtlos, hann ich zu meinem Freind Schorsch gesaad. Doo iss der awwer schwäär uff die Balustraade gang: Das wär doch genau das Problem! Dass mir immer nur die Naduur schiddse sollde, awwer weit unn breit känner wär, wo uns vor der Naduur schiddsd. Doo hann ich ne kinne beruuhische: im Grund bräuchte mir die Naduur garnidd, fier Schääde aanserichde. Das mache mir schunn selwer vill besser unn grindlicher.

Mehr von Saarbrücker Zeitung