Es äänzische was mer am Bahnhof nidd kried hadd, das ware Fahrkaarde. Also seminneschdens nimmeh am Schalder, nur ausem Audomaad. Wo mer allerdings uffem zwädde Bildungswää hadd misse seerschd e Diplom mache. Falls mer mool e bissje weider wie noo Saarbrigge hadd wolle fahre. Das iss awwer jedds vorbei, weil mer neijerdings nur uff e grienes Knebbche drigge muss. Unn mer werrd per Bildscherm midd jemand verbunn, der wo sich in der Mateerije auskennt.

Unn drause vor der Dier hannse sogar Boxe uffgestelld, wo mer sei Fahrrad unnerstelle kann. Alles weeje der Mobilitääd. Was nix middem Mobiliar se duun hadd. Unns dauert wahrscheins nimmeh lang unn se duun uns dorthin bieme wo mer hin wolle.Awwer trotz Eisebahn unn Fahrrad - es beliebdeschde Mobilitääds-Werkzeich iss unn bleibt unser beschdes Stigg, es Audo. Weils so bequem iss. Demnäägschd fahrt das sogar vunn selwer.

Unn weil Auto uff deitsch joo selwer hääscht, doo stimmt das joo aach endlich. Mer braucht dann aach kää Fahrer meh am Steier. De Pilot im Auto iss dann de Autopilot. So wie im Fluuchzeich. Unn der duud noch nidd emool streike. Am Enn brauch ich nirjendwo meh hinsefahre. Ich hugge vor meim Kombjuuder unn duun mei Audo fernsteijere. Ich bleiwe gemiedlich dehemm unn es fahrt zum TÜV odder steht fier mich im Stau. Wos sich dann midd de annere Geischderfahrer erummäärjere kann. Unn vunn weeje: Zeije se mool ihr Fiehrerschein odder bloose se mool ins Rehrche, das iss dann aach vorbei.