Kolumne SAARMÒÒ Off Irrfahrte met Navichi
Iwwer vill Wäje kemmt mä vo hei no Koblenz: etwa mem Zuch, mem Audo orrer ze Fouß no Klause o da weirer mem Bus. Eich hot mich foär de Zuch entschied. Iärschdens es off de Glääse wenijer Betrieb wie off de Stroße, zwodens setze bei dä Bahn net so vill Handy-Zombis am Steijer. Allään woär‘ich aach net, e Freundin aus dä Palz woär bei mä. E gudd Stonn ha mä e Treijer Hauptbahnhof gehuggt, da muschde mä e annere Waggon, anschließend e annere Zuch on endlich e anner Glääs souche.
Treijer es scho schee, mir awwer muschde no Koblenz. Hät net e großer Mann om Platz voär uus ganz laut gesaat, ä mischd genau doärthi, wo mir aach hi sollde, mir wäre ze spät komm. So se mä metgeholl gä o ha dofoär von deäm Mann beibrat grid, wat mä sowieso scho woschde: Datt die Bahn äänfach de beschd Reklame foär‘t Audo meschd.
Bei usem Termin ha mä zwo Bekannte troff, aach aus dä Palz. Die woäre mem Audo komm. Zesamme ha mä zwo Stonne en‘eme Feschdsaal feschdgesäss – doher der Name – on hennerher har‘et als Entschädijung e Ässe gä. Uuser Zuch zreck woär do längschd abgefahr. Zum Gleck han die freindlije Pälzer noch Platz em Audo gehaat.
Wer jetzt menn, domet wär die Sach gudd ausgestann, der verdud sich. Weil nämlich dat alde Navi em Metfahraudo scho off dä Hifahrt de Gääschd offgä hot, hat sich dä Fahrer misse aan dä Sonn orijentiere on die woär grad ennergang, dofoär nur dabber fort vom Rhein. No ä Zeit e Schild: „Hermeskeil“. Hermeskeil es de richdisch Richdung, han‘ich vo henne getut, Hermeskeil es Honsreckhöhestroß. Dä Fahrer awwer wollt off de Audobahn o ‚zack‘ woäre mä om Wääsch no Köln.
Köln, dat es ganz falsch, ha wei gleich drei Fraue em Audo sierent. Mir es egefall, datt mä dat alde Navi aan dä Zigarettesteckdos offlare kinnd. Klasse, e super Idee, no 20 Minude om Standstreife hat dat Navichi sich gemellt: „Nach 8 Kilometern fahren Sie rechts.“ Dä Fahrer hat sich brav aan jed Anweisung vom Navichi gehall, gleich droff se mä nommo e Koblenz egelauf. Doärt hat et Navichi uus ganz lang de Stadt gewies o grad wie die Fraue em Audo en e schnuggelisch Lokal wollde, kemmd e Schild: „Hermeskeil“, wie voär Stonno. Mir Fraue ha ab do dürfe schloofe o wach gä se mä ijärschd, wie beim Kurwe em de Eifelturm kä Parkplatz ze fenne woär.
Karin Klee lebt in Wadern. Mehr im Netz unter http://karinklee.saar.de/
