Was solle mir dann doo erscht saan midd unserem Platt. Wo se joo aach immer widder proffezeid hann, dass das sich nimmeh lang halle werrd. Awwer die Nachrufe ware dann doch vielleicht e bissje iwwereilt. Wammer bedenkt, wasse allään bei uns in der Geeschend fier Mundartveraanstaldunge uff die Bään gestellt hann. Unn dass so ebbes offensichdlich zu rer Art kuldureller Grundversorschung geheert, das sieht mer doodraan, dass de Saal jedesmool voll iss. Wobei Dengmerd sowieso schunn immer e stattlichi Ahnereih vunn Mundartdichter uffseweise gehadd hadd. Besunnerschd riehrisch in der Beziejung iss aach de Mundart-Ring Saar, wo reechelmääsisch sei eicheni Zeidung, die Mundart-Post, erausgewwe duud. Näägschde Monaad kummt doo sogar schunn die fuffzischsde Ausgaab eraus. Unn es Gesamtverzeichnis lääst sich fascht so wie e Lexikon iwwer die saarlännisch Mundart. Wobeis die joo eichendlich so generell garnidd gebbd. Unser Mundart iss nämlich so scheen, dass die direggd in mehrere Variazioone vorkummt. Die wo grob sordierd werre ins Moselfränkische unn es Rheinfränkische. Was nidd se verwechsele iss middem Altfränkische. Obwohl sich die Sproch manchmool so melodisch unn ausdruggsstark aanheert wie klassischi Lüürigg. Im Saarlandbuch vumm Fred Oberhauser kammer doodezu e Zitat lääse, wo de Professor Haubrichs uffgeschnappt hadd. Wie änner im Geschäffd noome Artiggel frood unn zur Antwort kried: Hann duumers nidd, awwer krien kinds sinn, dass mers dääde.