Mundart-Kolumne für St. Ingbert E gudder Mann midd hochgesteggdem Profil
Was hadd mer neilisch misse in der Zeidung fier e Schreggensmeldung lääse: „Deutschland gehen die Nikoläuse aus!“ Awwer mer kennt das joo middlerweil aach aus annere Brangsche, dasse qualifizierdes Personal suche.
Meischdens noch garnierd midd dem scheene Zusadds „händeringend“. Was awwer nidd unbedingt ebbes middem Fingerhakle se duun hadd. Apropos Bayern: Dort hadd sich e hochrangischer Bolidigger, weil er fatalerweis de Weihnachtsmann middem Niggelaus verwechselt hadd, de geballde Volkszorn zugezoo. Iwwrischens war joo de heilische Mann, wo doo als Vorbild dient, eichendlich aach e Zugezooner. Er iss nämlich urspringlich aus Kleinasien kumm. Obwohl er immer behaupde duud: Vunn draus vumm Walde kumm ich her.
Dass awwer de Arweddsmarkt fier Niggeläuse awweile so leergefeechd iss, dass leid nidd seleddschd an dem hochgesteggde Anforderungsprofil fier so e Betäädischung. Mer muss zum Beispiel als Freiberufler sei Ausrüschdung selwer middbringe. Unn vunn der Stadduur her muss mer äänerseids so impoosand sinn, dass die Kinner vor emm Reschbeggd hann. Annerseits muss mer awwer noch durch de Schorschde passe, ohne sich sei Habit se begleggere. Auserdemm iss der Insadds vunn der Sääsong abhängisch unn die iss doch aarisch korz. Unn im Geejesadds zu seine Kolleesche aus Schoggelaad iss e Umschulung zum Oschderhaas nur schwäär meeschlich. Es iwwrische Johr steht dann sei Renndierschlidde unneedisch in der Garaasch.
Apropos Schlidde – e Verkehrsexperrde vun der Buusgeldstell hadd jedds mool zimmlich genau noogerechend, dass de Niggelaus in jeedem Winder e ganzi Ladd vunn Verstöös geeje die StVO begeht: Zu hoohi Geschwindischkääd, mangelhaffdi Beleuchdung unn ungenüüchende Ladesicherung.
