Unn sogar die Minischderpräsidentin soll zur Eröffnung kumme. Ob allerdings de Debbich, wo se dann ausleeje ausgerechend rot iss, wääs mer nidd.De Wettbewerb heerd uff denne scheene Noome Obelisk, weil am Enn die Schüüri e Pokal vergebbd, der wo faschd so aussieht wie de Gollestään in Blieskaschdel. Unn dass die Teilnehmer aach scheen siehn, wie so e Obelisk in natura aussieht, doo hannse fier die Filmemacher aus ganz Deitschland e grooses Besuchsprogramm sesammegestellt. Midd Panorama-Bligg unn ganz vill filmreife Motiefe aus der Umgebung. Was mich nur mool interessiere werrd iss, ob die Filme heidsedaachs noch in Rolle abgespielt werre. Wie sellemools im alde Kinntobb. Wahrscheins nidd, weil die Kameras heid meischd all digital sinn.Iwwrischens sinn das bei dem Filmfeschd alles ausgesuchte Kurzfilme wo doo laafe. Das sinn an die 500 unn die hädde se sunschd an denne vier Daach garnidd unnergebrung. E Kurzfilm iss besser wie e langweilischer Film. Nää, war nur Spaß. Es Geejedääl vunn Kurzfilme sinn joo Filme midd Iwwerlänge. So wie ganz friejer die hisdoorische Schinke, wo meischd im alde Rom odder im Orient gespielt hann. Unn doo hannse drei Preisklasse gehadd: Fier Zuschauer unner 18, fier Zuschauer iwwer 18 unn dann noch fier welle, die wo während der Vorstellung 18 worr sinn.