Bei so rer SMS - was iwwrischens e Abkerzung iss fier: Schreib mool schnell - soll mer sich awwer meeschlichst korz fasse, weeje de Gebiehre. Ei gugge mool doo, hann ich gedenkt: Ganz genau so wie friejer in der Telefonzell, wo aach draangestann hadd: Fasse dich kurz! In dem Punkt sinn mir Saarlänner allerdings schwäär im Vordääl. Weil mir in unserem Platt e Ausdrugg im Repertoir hann, woos kerzer unn knaggischer garnidd geht. Das scheene Werdche "unn" kann nämlich, je noo Betonung, e ganzer Schwall vunn hochdeitsche Sätz erseddse. Desweeje isses aach bei rer Umfrage als beliebdeschdes Mundart-Wort gewählt worr. Meischd werrds joo benuddsd in der Frageform. Unn es kann sich dann uff die globale Gesamtsidduazioon odder uff die jeweilische perseenliche Laache bezieje. Oft aach midd dem Zusadds: Wie isses? Doo kummt dann prompt die Antwort: Unn selwer? Doodrann kammer mool widder scheen siehn, dass mir fier e gefleechdes Gespräch garnidd vill Worde brauche. Beim partnerschaffdliche Gedangeaustausch gehts sogar noch wesentlich tiefsinnischer zu. Wann zum Beispiel der ään e Fluddsch zieht unn der anner wisse will, was dem fier e Laus iwwer die Lewwer gelaaf iss: Iss ebbes? Wammer denne hochfilosofische Satz ins Hochdeitsche iwwerseddse wollt, dann käm wahrscheins eraus: Sein oder Nichtsein, das ist hier die Frage. Ich bin mir jedds awwer nidd sicher, ob de Shakespeare schunn Saarlännisch gekonnt hadd.