Die Räumlichkääde selwer, wo e sinvolli unn zukunftsträschdischi Verwennung finne. Dann die junge Leid, die wo doo unner ideale Bedingunge ihrem Forschungsdrang fröhne kinne. Unn fier Dengmerd selwer fallt aach fiers Renommee ebbes ab, weil die Stadt doodemidd ihr Ruf uffpoliert, dass hie als mool neije Ideeje spriese. Gehirnschmalz uff der Schmelz - sosesaan. Wo nämlich die Ressource knabb werre, doo iss das de Rohstoff midd de greeschde Zukunftsaussichde. Unser Herrn iss joo bekanntlich de fänomenaalschde Kombjuuder woos iwwerhaupt gebbd. Wo fier die Heejeflüüch vunn der menschliche Kreeatiwitääd zustännisch iss. Insofern isses e bissje unnertrieb, wammer sei Grundbaustään als graue Zelle bezeichne duud. Was sich eejer e bissje armseelisch aanheert. Falls sie awwer noch nidd wisse sollde, dass Mint-Campus die Abkerzung iss fier Maddemadigg, Informadigg, Naduurwissenschaft unn Technigg, doo sinn sie in beschder Gesellschaffd. Das war neilich nämlich sogar mool e Thema in rer Quizz-Show im Fernsehn unn der Kandidaad hadd das bei der Geleechenhääd aach nidd gewisst. Unn de Campus, das iss äänfach de akademische Ausdrugg fier das Terräng, wo es Geherrnschmalz uff Tuure gebrung werrd. Mint hadd jedenfalls nix midd Pefferminz se duun. Eejer noch midd Minz im Sinn vunn Kläängeld. Weils joo fier das Projeggd sogar noch Zuschüss gebbd. Unn jedds schunn iss doodebei ebbes erauskumm, was in Dengmerd zur Zeit schwäär selde iss: e äänstimmischer Beschluss.