Mer glaabds ball nidd, dass schunn widder beinah e ganzes Johr rum iss. Awwer wann erscht mool die Monaade zwäästellisch sinn unn die Uhr umgestellt werrd, doo geht das dann ganz schnell. Unn wo se iwwerall in de Reklame schunn uff Weihnachde gepolt sinn, doo iss Silweschder aach nimmeh weit. Dasses oowends jedds schunn friejer finschder werrd, das zieht awwer aach die lichtscheije Gestalde aan und die Bolizei warnt vor de Langfinger, wo uff Tuur sinn. Mer traut joo schunn ball nimmeh denne Ausdruck Bei Einbruch der Dunkelheit in de Mund se nemme. Neilich hann ich e Schild gesiehn, wo e verängschdischder Hausbesitzer sich doodegeeje schitze wollt und e Schild rausgehängt hadd midd der Uffschrift: Wahnanlage! Awwer aach wammer ausem Haus rausgeht, muss mer sich schwäär in Acht nemme. Midd de Temberaduuure falle nämlich aach die Blädder unn die sinn gliddschisch. Desweeje gebbds fiers Audo die Winderrääfe, aach wann noch kää Schnee gefall iss.Unn mer muss im Wald uffpasse weeje die Wildsäu.

Awwer nidd nur die Schwarzkiddel mache emm bei denne Lichtverhältnisse aarisch se schaffe. Doo gebbds aach noch die Fuusgänger wo in der Dämmerung in Trauerkläädung seeleruuisch quer iwwer die Stroos marschiere. Dass dann weensichdens die Schulkinner sicher iwwer die Stroos kumme, doodefier hannse die lobenswerde Akzioon Laufbus ins Lääwe geruuf. Wo se die Klääne insammele unn im Geleitzuuch liwwer die kriddische Stelle driwwerlotse. Unn bei der Geleechenhääd hann ich e dolles neijes Wort gelehrt: Boddemtätowierung.