Mer kanns ball nidd glaawe: am Sunndaach werre widder die Azwenzkränz ausgekraamt. Unn prompt steht aach schunn de Stess uff der Matt, vun weeje der Planung in der Vorweihnachtszeit. Doo trefft mer sich midd Kolleesche unn Gleichgesinnde gäär zu obligatorische Weihnachtsfeiere nidd bloos in der warme Stubb, nää aach im Freije gebbd sich bei Gliehwein unn Zimtwaffele versammelt. De Weihnachtsmarkt in Rohrbach macht iwwermorje de Ufftakt. Mer missd äänfach meh Zeit hann vor de Weihnachde, fier die Termine all unner ääner Hudd se krien. Ich menn, dass mers so macht wie de Einzelhannel unn feiert es Feschd im September iss joo aach kää Leesung. Awwer doo sinn die leddschde Johre schunn jeedi Meng Kebb geschiddelt worr, ohne dasses ebbes geholf hädd. Unn bisses dann werklich Weihnachde iss, hannse es vorgezoone Gebägg schunn längschd all an die viele Vorwiddsnase verfidderd. Awwer die Leid, die wo zum Beispiel imme Verein sinn, fier die werrds jedds werklich eng. Unn weil joo de Saarlänner generell glei in mehrere Vereine iss, doo kummts dann leicht zu terminliche Iwwerschneidunge. Vun familiäre Inntrüwunge als Innstimmung uff die stille Zeit wolle mer mool gar nidd schwäddse. Wobei mer joo nix geeje Weihnachtsfeiere gesaad hann will. Wos doo immer so scheene Tombola-Gewinne gebbd. Manche Vereinsvorständ ware joo schunn ganz schlau, die hann sich gesaad: doo gehn mir dem ganze Stress äänfach ausem Wää unn zieje die Weihnachtsfeier vor in de November. Awwer weil uff die geniaal Idee aach schunn annere kumm sinn, bleibt dann a im November alles beim Alde. Ich glaab, es begehrdeschde Gechenk fier Weihnachde wär iwwerhaupt e groosi Tuud voll Stunne, die wo noch nidd verplant sinn.