Friehjohr kommt midd Macht
Noch vier Daach unn er iss endlich doo, de Wonnemonat Mai, wo alles nei macht. Wo die Bääm ausschlaan unn mer selwer in Versuchung kommt, fier Bääm aussereiße. Es gebbd joo Unmenge vunn Werder wo midd dem Monaad sesammehänge. Wo emm jeedes Mool es Herz uffgeht, jee noo perseenlicher Instellung: die Maiaandacht im Griene, de zinfdisch geschmiggde Maibaam, wo mer notfalls drumrumm danze kann odder die Maiboole, die wo noo Waldmääschder duffde duud. Schwäär romandisch iss aach die Maiennacht, besunnerschd wann dann noch de Vollmond uff die Zeenerie erunnerscheint. Doodefier misse mer allerdings noch e paar Daach waarde.Am scheenschde heerd sichs awwer aan, wann noch jemand denne anheimelnde alde Ausdrug gebraucht: Ich gehn maije. Im rheinische Werderbuch steht die exaggd Definition: "In des Nachbarn Haus gehen, bes. nach Feierabend oder an Winterabenden, um dort zu spinnen, plaudern, die Zeit durch Pl. zu vertreiben". Unn es gebbd nadierlich noch Dutzende vunn Lieder, wo de Mai in de heegschde Teen besung werrd: "Komm lieber Mai und mache …"
Apropos mache, das iss aach so e Wort, wo mir in unserer Mundart so häufisch gebrauche, dass mer menne kinnd, mir wäre e Volk vunn Machern. Wann ääner midd stolzgeschwellder Bruschd saad: "Lass mich nur mool mache", doo mennt mer, gleich kummt de Heinz Becker um die Egg. Denne derf mer dann nidd steere, sonschd mosert der: "Mach mich nidd worres!" Unn de Ausdrugg vunn Erstaunen iss bei uns e knabbes "Mach Sache!" Odders Geejedääl: "Mach kää Sache!" Bei uns gehn die klääne Kinner sogar schunn e Bach mache. Unn wann sich ääner uff de Schlibbs geträäd fiehlt, doo hääschds: "Mach der bloos mool nidd glei ins Hemd!"
