Die Saarlänner sinn joo bekannt defier, dasse gääre im unn ums Haus erumm eichenhändisch unn ortsverscheenernd täädisch sinn. Fier so ääner hammir sogar e extra Bezeichnung, denne nenne mir Knauber. Also ääner, wo de ganze Daach am Knoddle unn am Bossle iss. Wann nämlich de männliche Dääl vun der einheimisch Bevelgerung am Summeliere iss, was er als näägschdes so mache kinnd, doo kummder leicht ins Dübeln. Längschd duud de gestandene Heimwerker sich nimmeh doodemidd begnieche, dasser e Hasestall architeggtoonisch in Form bringt odder die Garaasch midd Reegibbsbladde verklinkert. Nää, was e richdischer Dachladde-Tschämpijen iss, der zieht e kombledd neijer Aanbau hoch oder e vollverglasder Windergaarde. Also ich als verschämder Besiddser vumme Paar linke Hänn kann joo so jemand nur bewunnere. Wie mer middme Presslufdhammer odder me Bolzeschneider so erumhandiere kann, ohne dass mer sich doodebei bleibende innere Verleddsunge beibringt, das iss mir e Rätsel. Unn was die bei so Akzioone fier Werkzeich brauche und fier e Madderial verschaffe! Awwer doo leid aach das Probleem. Friejer, wo die Männer hie uff der Grub geschaffd hann, doo hadd mer sich joo alsmool kinne e Sää, e Vierkantholz odder e Stemmeise längerfrisdisch ausleije. Awwer die Zeide sinn vorbei, unn mer muss gugge wo mer sei Zeich herkried. Doodemidd wars awwer in Dengmerd die leddschd Zeid Essisch, weil es einschläächische Unnernehme die Fladder gemacht hadd. Awwer jedds hadd joo in dem scheene Gelände nochmool e neijer Baumarkt uffgemacht. Baumarkt, bei dem Wort doo krien unser Heimwerker ganz glänzende Aue. Desweeje nenne die meischde vun denne sich aach im Unnertitel Paradies.