Sei doch kää Frosch

Wo se joo awweile graad e Name suche fier denne biologische Frosch aus Stoff, doo iss bei der Geleechenhääd aach de Vorschlaach uffgetaucht, fier denne Horsti se nenne. Unn doo muss ich mich als Betroffener doch mool melle. Ich menn, wanns weenischdens um e Adler gang wäär, doo werrd der Name joo passe. Awwer e Frosch! Ich hann joo auserdemm schunn genuch Probleme midd meinem Familjename

Wo se joo awweile graad e Name suche fier denne biologische Frosch aus Stoff, doo iss bei der Geleechenhääd aach de Vorschlaach uffgetaucht, fier denne Horsti se nenne. Unn doo muss ich mich als Betroffener doch mool melle. Ich menn, wanns weenischdens um e Adler gang wäär, doo werrd der Name joo passe. Awwer e Frosch! Ich hann joo auserdemm schunn genuch Probleme midd meinem Familjename. Wann ich uffs Amt kumme unn saan, mei Name wär Lang, doo krien ich garandierd zur Antwort: Ei das macht nix, mir hann Zeit! Wie wärs dann wammer denne Frosch Huppsi nenne werrd. Awwer doo kried mer wahrscheins Huddel midd der Witwe vum Heesters. Mer sieht, so Wortspiele midd Name sinn es heikles Plaschder. Unn desweeje duud joo aach uff de Eltere e schwääri Verantwortung laschde, wann se e Name fier ihr Kinner aussuche. Am beschde iss änner, wo sich nidd so leicht verhunze odder verniedliche kann. So e Uuzname hadd mer nämlich schnell am Backe, wo mer dann lääwenslänglich nimmeh loswerrd. Bei uns hääscht joo sogar die Queen schlicht unn äänfach es Lisbeth. Unn uffpasse sollt mer aach, dass de Vorname zum Nooname passt. Raphael Kraxelhuber hat vielleicht fier denne arme Buub im spätere Lääwe unnerwinschte Nääweeffeggde. Doo iss joo, um uff denne Frosch seriggsekumme, e liebevolles Mei klääni Krodd noch harmlos. Desweeje hadds sogar unner ingefleischde Fans vun Wortspiele de Grundsatz gebb, dass mer iwwer Name kää Kalauer macht. Es kinnt näämlich leicht uff em selwer seriggfalle. Awwer doodraan dudd mer sich scheins neiderdings aach nimmeh halle. In rer Buchhandlung hann ich jedds Das Liebeslexikon der Vorname gesiehn mit dem einprägsame Titel: Schnaxel nie midd einem Axel.