Mer kann sich nämlich fier e Abbel unn e Ei an der Akzioon perseenlich beteilische. Unn das Ganze sieht dann nidd nur ansprechend aus unn duud himmlisch duffde, es iss aach noch fier e gudder Zwegg. Blume sinn joo allseits schwäär beliebt weeje der Ässteedigg. Obwohl se vumm buchhalderische Standpunkt aus komischerweis fier de Mensch eichendlich kää messbarer Nuddseffeggd hann. Auser vielleicht uffem Umwää iwwer die Biene, die wo joo uff e meeschlichst üppischi Flora in der freije Wildbahn aangewies sinn. Unn dann gebbds aach noch die Schnittblume, midd unn ohne Babier drummrumm, zum Verschenke. Die sinn joo friejer meischt in der amuröse Rhetorigg zum Insadds kumm. Also dort, wo mer hadd wolle ebbes zart durch die Blume aandeite. Weil mer sich geniert hadd, fier sei Gefiehle unverbliemt aussedrigge. Doo hadd mer awwer schwäär misse uffpasse, dass mer uff der bunt Sskala nidd denääwe unn sich sosesaan im Farbton vergriff hadd. E ganz traurisches Kabiddel sinn joo die Blüte, die wo als Falschgeld in Umlauf gebrung werre. Wer doodebei erwischt werrd, dem blüht e mehrjährischer Uffenhalt im Bulles. Erfreilicher iss doo schunn, dass mer Blüte aach als Orakel beniddse kann. Wammer se noonanner abzubbt unn ganz gespannt frood: Ääs liebt mich - ääs liebt mich nidd? Wo dann am Schluss als Echo das scheene Lied rauskummt: Niemand liebt dich wieso ich.