Vun de Sogge
Es muss schdigger vier Jòhrzehnde här sinn, dòò had má uff äämòò an Männerfiis weise Schdrimb gesiehn: Weise Tennissogge aus Froddee, mid owwerum bunde Gringelscher, awwer ach gans weis in weis. Wie die Aadsdsogge, die hann aach zum eerschde Mòo de Wääsch gefunn zu gewehnlische Leid wie unseränns. Jedds kam'má sisch mid'me bisje Fandasie vòrschdelle, dass isch aach so Sogge kaaf unn aangezòò hann
Es muss schdigger vier Jòhrzehnde här sinn, dòò had má uff äämòò an Männerfiis weise Schdrimb gesiehn: Weise Tennissogge aus Froddee, mid owwerum bunde Gringelscher, awwer ach gans weis in weis. Wie die Aadsdsogge, die hann aach zum eerschde Mòo de Wääsch gefunn zu gewehnlische Leid wie unseränns. Jedds kam'má sisch mid'me bisje Fandasie vòrschdelle, dass isch aach so Sogge kaaf unn aangezòò hann. Weise Sogge! Isch! Allerdings inzwische seid nägschd virdsisch Jòhr nim'meh. Gudd, so Sogge ware ofd nidd aarisch lang reinweis. Awwer wem'má sei Schdrimb sowisso minnischens äämòò am Daa weggseld, dudd das nidd weider weh. Isch bleiwe debei: Wem'má se denòò kann koche, is das nidd vákehrd, ach wenn se nidd vun ausgemachde Schweisfiis dursch unn dursch nass gemachd worr sinn.
Abroboo Schweisfiis: Dòò gebbd's noch e Middel: Sandale. Rundrum frisch Lufd an die Gwande, das kinnd, wenn's känn vázweifelder Fall is, váhinnere, dass'se im eischne Safd koche. So gesiehn ach känn iwwli Sach. Wenn jedds nidd ebbes Endscheidendes dezwische käm: es ausgebrääschde ästeedische Emfinne vun de Leid. Unn de Ton genn aan wischdische Leid, wo beschdimme, was gehd unn was nidd. Denne ihr geschmaggvolles Feingefihl saad nämlisch: Das gehd nidd. Weise Sogge sinn schaurisch, Sandale grusslisch. Beides sesamme gans unn gaa indiskudabel. In Idalje, villeischd ach sunschwo im sunnische Siide werre deidsche Turischde so karikierd, ganierd mid kurdser Buggs unn halb uffne Gnebb am Hemd.
Isch váschdehn das jòò, ehrlisch, mòò wenischens e bisje. Má gridd in der Aad, nidd nur in dá weid Weld, sondern dehemm genauso, Sache se siehn, wo má ach mid bescheidne Aanschbrisch an Scheenhääd unn Ästeedig liewer wegguggd. Das erglärd mir awwer nidd, warum seid Jòhre schunn grad Sandale unn Sogge unner Dauerbeschuss schdehn. Isch befirschde, es gebbd e paa unerfreilische Grind: Eerschdens: Aarisch vill Leid gwassele allsegäär nòò, was se vòrgeschwäddsd grien. Vòr allem danne, wenn's ebbes Schleschdes iwwer annere is, má kann dann so uff annre runnergugge. Zweddens: Es kann so vill schief gehn, wem'má Sesammehäng nidd rischdisch geschnalld gridd. Hie nidd! Dòò kam'má sisch scheen wischdisch vòrkumme geniesd das scheene Gefihl, má schdehd selwer uff dá rischdisch Seid. Wo's Läwe doch so komblizierd is unn's menschlische Sesammeläwe noch komblizierder. Unn iwwer Geschmagg kinnd má schdreide, má kann's hald bloos nidd. Deshalb driddens: Sogge unn Sandale, das erkennd sogaa noch de greeschde Debb ohne Broblem. Unn wenn der sisch derf uffreesche iwwer schleschder Geschmagg unn kann dòòdursch aach mòò ebbes rischdisches Wischdisches schwäddse, soll's em gegennd sinn, herdslisch gegennd sogaa.
Isch bin jòò schunn so abgegläärd, dass misch so Fubbes niddemòò kinnd uffreesche, wenn'á má wirglisch geje de Schdrisch gääng. Awwer se lache hann'isch. Wenn isch will iwwer Sogge in Sandale, das kummd selde vòr. Degeje ofd unn gääre iwwer die kinschdlisch Uffreeschung. Dòò bin isch vòr Lache gladd vun de Sogge.
Peter Eckert lebt seit 1972 in Wadgassen-Differten. Letzte Veröffentlichung: der Asterix-Band "Die Sischel vun Gold".
