Ringsrum laure beese Leid, forr ämm ebbes Beeses aanseduun, rischdisch schlimm odder klääne Nòòdelpiegser. Degeje saa má doch: Mir selwer sinn so lieb unn haamlos, kinnde känner Migg ebbes selääds duun. Jòò, jòò, die Weld is so ebbes vun schleschd unn ungereschd!

Tja! Glawe Sie‘s, wenn Ihne jemand so ebbes vòrjòòmerd? Glawe Sie im Ernschd, die (!) Mensche wäre so? Isch glaab's nidd! Allään schum'mòò isch. Ob Se's glawe odder nidd: Misch muss má meischdens schunn kräfdisch odder länger zwiwwele, bis isch mòò rischdisch deidlisch wäre. Gudd, isch genn's zu: Wenn isch deidlisch werre, dann ofd so, dass Leid beleidischd sinn, wo bis dòòhin geglaabd hann, mid mir kinnd má de Hannjoggel mache.

So vill zu mir. Awwer es gebbd jòò ach die annere Leid. Unn wenn isch misch nidd aarisch irre, sinn die ofd im Grund aach liewer friedlisch. Es gebbd Unnerschiede beim Tempramend. Ob má frihjer reagierd odder hefdischer odder nidd so schnell vágessd: Engel sim'má sowiso nidd, awwer ach wirklische Deiwel sinn seldener wie má ofd se heere kridd. Villeischd solld má nur ännfach bei annere nidd kriddelischer sinn wie bei sich selwer.

Weil: Má kinnd sisch de ganse Daach ärjere. Awwer má is nidd váflischd dezu.

Peter Eckert lebt in Differten. Ende November erscheint sein Weihnachtsbuch (Mundart und Hochdeutsch) "Wenn widder wirklisch Weihnachde wär". Im Buchhandel oder per E-Mail: eckertbuch@email.de erhältlich.