Tembo 30 odder: Vákehr vákehrd
Vákehr vákehrd. Na unn? Vákehr muss vákehre, dass má vun hie nòò dòò unn dord kummd. Dòòzu had's "Fuusvolk" lang nur sei Fiis gehadd, egal wie weid. So reescheld sisch's Tembo selwer, unn má schlubbd ach dòò dursch, wo's eng unn huwwelisch werd. Heid awwer heischd's dauernd: "Alle Räder stehen still". Nidd weil e staager Aam das will
Vákehr vákehrd. Na unn? Vákehr muss vákehre, dass má vun hie nòò dòò unn dord kummd. Dòòzu had's "Fuusvolk" lang nur sei Fiis gehadd, egal wie weid. So reescheld sisch's Tembo selwer, unn má schlubbd ach dòò dursch, wo's eng unn huwwelisch werd. Heid awwer heischd's dauernd: "Alle Räder stehen still". Nidd weil e staager Aam das will. Nää, má is sisch gejeseidisch in de Fiis (odder wie saad má bei Räder stadd Fiis?). Dòògeje wisse ach Experde känn Middel, auser an Symbdome se dokdere. Bringd das, dass de Vákehr vákehrd? Ach wo! Awwer zum Ausgleisch laafd de Vákehr vákehrd.Die ledschd "gudd Idee" is noch faschd nei: Tembo 30 im Ord. Heegschens als Ausnahm uff dá Haubdstròòs Tembo 50. Má kennd das jòò: Immer schärfere Gesedze unn immer wenischer druff gugge, dass se ingehall werre. Isch kenne genuch Tembo-30-Stròòse. Dòò sinn Leid, wie má noch 50 durfd, mid 80 unn mehr dursch de Ord gebredderd. Wenn isch misch nidd aarisch irre, fahd e gudd Dääl vun denne jedz genauso wenisch 30 wie vòrhär 50. Draan halle duun sisch die Brave, die gudd Dumme. Die, wo so fahre, dass ach mid 50 nix passierd. Awwer is das nidd normal in dá Weld, dass sisch grad die aangesproch fihle, wo eindlisch nidd gemännd ware?
Unn wer alles so e Mordstembo vòrleed! Mofas zum Beispiel. Má sidd es Kennzeische unn wääs: Se dirfe 25. Das machd ach ääns vun zehn Mofas. De Reschd muss e anner Sord Tacho hann. Die fahre 40, 50 odder so. Unn wenn isch dehinner zuggele misd, had das ach sei Vordääle. Awwer grad die Daache fahd vòr mir so e Mofa, zwei Leid druff, zimmlische Brogge sogaa. Die Stròòs stramm berschuff sinn die zwei abgediisd, se hann misch reeschelreschd abgehängd, mid Tembo 70 minnischens. Sie wolle hald forr rischdische Biker gehall werre, unn e Harley kaafd jòò aach känner, forr langsam se fahre.
Awwer die uff vier Räder sinn aa nidd besser. Gudd, zehn Sache se schnell, passierd emm. Awwer 200 stadd 80, das muss má wolle. Werd der aus em Vákehr gezòh, kann á mir nidd lääd duun. Wie der, wo misch in dá Kurv vun dá Stròòs treibd, weil á mid em Handy am Ohr nidd uff seiner Seid bleibd. Is das ach noch e Bus, ehrlisch, dòò meeschd isch känn Au zudrigge. Es kann doch sowiso schunn so vill passiere, dòò muss má's doch nidd druff aanleje. Es laafd hald mid em Vákehr vákehrd, wenn jeder Haazkrämer mennd, er misd sisch sei Gesedze selwer mache. Awwer wem'má jedz Tembo 30 krien, werd jòò alles gudd, gell?
Also, isch wisd jòò e Leesung, wo wirklisch klappd: Se solle all dehämm bleiwe. Was wäre dòò die Stròòse scheen läär! Unn isch kinnd fahre, fahre, fahre. Bloos: Isch befirschde: Die Leid mache dòò nidd mid. Die saan villeischd sogaa, isch solld die Stròòs frei halle. Freschhääd! Awwer Sie, Sie genn doch mir Reschd, wo isch Ihne jedz alles so scheen erklärd hann. Odder?
Peter Eckert, aufgewachsen in Saarbrücken,lebt in Wadgassen-Differten. In der Bosener Mühle wird er am 29. Juli 2012 voraussichtlich einen Mundartgottesdienst halten.
