Mid Aue vun heid betrachd, bisch de dòò vun de Sogge: In denne gaanidd so aarisch alde Zeide waa má e Rebell mid Texashose, also Jeans . Forr bei Buxe se bleiwe: E Mäde mid Hos waa, auser villeischd im digge Winder, bedenklisch genuch. Awwer mid em Reisváschluss vòòre: So ännem waa alles zusetraue, nur nix Guddes. Odder de Sunndaase Aanzuuch: Alle Gebodd had ne misse aanziehje, wer nidd wolld heere, er dääd rumlaafe wie e Halbgehängder. Das ware hald alles Spieser dòòmòòls!

Degehe heid: Várobbde unn váschurbsde Buxe gebbd‘s forr deier Geld ferdisch se kaafe. Die Schnabb vun dá Kabb hinne unn die Buxekraddel am Knie siehn isch zwaa seldener, villeischd vákehr isch awwer bloos in de falsche Kreise. Dame vásteggele die Unnerwäsch nim‘meh zischdisch, sondern traan se owwedruff. Wenn mòò die Bux várudschd unn de halwe Boller mid me Fedze Stringtanga freileed, wemm solld das noch ufffalle? Soll doch jedes mache, wie's denkd! Ja, sinn dann die Spieser ausgestorb? Dòò bisch de gladd vun de Sogge!

Unn dann les isch, was es 2014 wie in de Vòrjòhre forr e Uffruhr gebbd, wenn jemand e Mann erspähd mid Sandale unn Sogge an de Fiis. Dòò heerd die Freihääd uff!!! So männe die neie Spieser vun heid. Unn erleischderd kannsch de uffòòdme: Spieser, wo männe, sie misde annere ihr Geschmagg uffs Au drigge, die wechsle es Thema, awwer die sterwe nidd aus. Dòò bisch de doch gladd todal vun de Sogge!

Peter Eckert, Differten, ist in Saarbrücken aufgewachsen. Im Mai errang er beim Mundartwettbewerb im pfälzischen Dannstadt den Publikumspreis.