Mundart-Kolumne Mol kräffdisch gekladdschd
Ab der näägschd Wuch kammer joo widder beguudachde, was fier kabareddisdische Pannegerichde diesmool beim Kläänkunschd-Fessdiwall in Dengmert uffs Tabeed kumme. Unn dann dauerds aach nimmeh lang bis es Teaader-Abbo in de Stadthall iwwer die Biehn geht.
Am erschde Oowend zeije se passend zur allgemeine Stimmungslaache die Kommeedieje „Ein Käfig voller Narren“.
Was die Mime joo nääwe ihrer meischd schmale Gaasche am meischde schäddse iss de Beifall. Mer saad sogar, der wär es Brood des Kinschdlers. Akussdisch heerd sich so e Applaus imme vollbeseddsde Saal beinäägschd aan wie e warmer Rään.
Unn die Dauer vunn dem Geräusch iss so ebbes wie e Gradmesser fier de Erfolsch vunn der Darbiedung. E beriehmder Kriddigger, der wo weeje seiner spidds Fedder gefirchded war, hadd mool geschrieb: „Der Beifall war endenwollend.“
Ganz friejer haddmer desweeje – speziell in der Oper – stimmlich gudd disponierdes Personal angaschierd, die sogenannde Klakööre. Die hann im Publikum gehuggd unn bei jeder Geleechenhääd laut Bravo geruf unn da capo! Unn de Tenor hadd dann e Zugab gebb unn die selb Arie nochmool geschmedderd.
Was mich irjendwie an denne uralde Musigger-Widds erinnert, wo es Publikumm gar nimmeh uffheere wollt fier se kladdsche. Unn ääni Zugaab noo der anner verlangt hadd. Wieso kladdschde die dann wie wild, hadd ääner im Parkedd sei Nochbar gefrood. So gudd kann der doch garnidd singe. Nää iwwerhaupt nidd. Awwer heid mache mer ne ferdisch.
Sowieso iss nidd jeder fier so e Kunschdgenuss emfänglich. Wie mei Freind Schorsch sei Scheff neilich mool ganz treuherzisch gefrood hadd: Kinnd ich e bissje meh Lohn grien?, doo hadd der ihm nur zur Antwort gebb: Quatschen Sie hier keine Opern!
