Mundart-Kolumne Holliwudds Nachwuchs
Dengmerd iss joo in puncto Film im Vergleich zu annere Gemeinde noch gudd uffgestellt, wie mer heid gääre saad. Mir hann hie e modernes klimaddisierdes Kino in der Rickertstroos midd zwää Sääl. Unn fier die Schbeziaalischde gebbds e Kinowerkstatt midd Bohéme-Flair in der Parrgass.
Doo hadd mer neilich sogar es professionell uffgemeewellde Immiddsch vunn Dengmerd uff der Leinwand bestaune kinne. Unn im Summer gebbds manchmool aach noch luffdisches Kino im Freije, wanns Wedder mitspielt.
Vor Johre hannse in Dengmerd sogar e abendfillender Spielfilm fiers Zedd-Dee-Eff gedrääd. Wo es Drääbuch vumm Heinrich Kraus war. Nur an dem Titel „Die Buddigg“ hann sich e paar gesteerd. Weil doch bei ihne dehemm immer alles tibbtobb uffgeraumt wär.
Ab heid geht awwer bei uns erschd richdisch die Poschd ab. Doo werre die Jungfilmer beim Bundesfeschdiwall „filmreif“ in Szene geseddsd. Circa sechzisch Kurzfilme werre gezeit. Unn fiers Publikum hääschd das: Vier Daach lang Kino sadd. Insgesamt e reifi Leischdung vonn de Organisatoore. Unn am Enn gebbds am Sunndaach e groosi Preisverleijung. Unn als special guest kummt de Florian Ross. Das iss e Dengmerder Buu, der wo graad midd seinem erschde groose Spielfilm bundesweit groos raus kumm iss.
Mei Freind Schorsch iss joo aach e ganz grooser Kinogänger. Awwer meh so in Richdung Traumfabrigg midd de groose Staare. Unn gefiehlvoller Musigg-Unnermalung unn Häbbi Enn unn so. Also ganz grooses Kino unn gewissermaase Popcorn fiers Au.
Manchmool allerdings, wanner noom Kino noch in die Kneip geht unn ganz spät hemmkummt, doo hadder dann e sogenennder Filmriss. Siehschde Schrosch, saan ich dann zuum: Das iss jedds wie im richdische Lääwe.
