1. Saarland

Mundartkolumne: Mer wunnerd sisch nidd meh wie iwwer die Leid!

Mundartkolumne : Mer wunnerd sisch nidd meh wie iwwer die Leid!

Unser Kolumnist Georg Fox wundert sich in dieser Woche über Leute, die gerne über dieses und jenes klagen – aber sich selbst nicht an ihre Mahnungen halten.

Die Weld iss verriggd! Das schdehd schummò feschd, glaab mers! Unn die Leid lääwe middem eewische Widderschbruch. Heid schille se iwwers ville Blasdigg, awwer mòrje im Laade gebbd jeed Tommaad äänseln ingepaggd. Iwwwer die Miljoone fier die Fuusballer meggere se in ääner Tuur unn de Sunndaach gebbd widder im Schdaadjonn iwwers Schbiel gejohld. Heid heischds, dass de Diesel sevill Schdaab rauslassd in der Schdadd, mòrje sinn se beim Audorenne dursch die Schdròòse, woo all gugge gehn unn kääner ebbes degeesche hadd!

In de Feerie buuche se e Greidsfahrd unn schille iwwer denne Dregg, der ausem Schorschde vun denne Schiffe rauskummd, wie wenn das Schiff vun elään fahre kinnd. Heid hann all Midlääd mid de Verkeiferinne, neggschd Wuch laafd mer dsem Lääd-Neid-Schobbing, als grääd mer iwwer de Daach niggs se kaafe.

Die Wuddse genn mid Aardsnei gepäbbeld, dasse wie e vierbäänisch Abbedeeg erumlaafe, awwer all kaafe die dobbeld Pordsjoon beim Meddsjer, weils Schniddsel ääwe so billisch sinn. Die Hinggelscher grien Leispulver ins Fudder unn all Eier sinn geliwwerd. Dò glaawe se, dasses nidd so schlimm wäär, weil mer sisch nimmeh de Kobb se schärre breischd, wann mer ins Esse Leispulver ninmachd. Aan jeeder Egg schdehd ääner mid seim Schmaardfoon unn schilld dòòdebei iwwer de Funggwelle-Schmogg. Mer demmenschdrierd, dass de Dorflaade offe bleiwe muss, awwer kaafe duhd mer im Subbermaargd in der Schdadd. In Feerie will mer effdersch im eischne Land bleiwe, awwer fliesche duhd mer wääsgoddwohhin unn noch weider. Se jòmmere iwwers Waldschderwe, verschbresche awwer, minneschdens beim Begrääbniss midsegehn. Es Raache halle se fier gaarnidd gudd in der Lung unn aach sunsch, paffe duhn se awwer als weider unn verschdobbele die Paggung inrer egsdra Schachdel, nidd dasse die schregglische Biller druff siehn misse. Erschd schille se, weil die Bolliddigger sisch im Wahlkamf nidd verkaddsbalsche, unn wann se sisch dann mò in die Woll grien, isses aach widder nidd reschd. Danne heischds, dass die Owwerschde e schleschdes Bild abgenn gääde.

All Leit saan, dass alles annerschd genn missd, awwer kääner gääd gääre bei sisch aanfänge. Muss mer sisch dò nidd doch e bissje wunnere?