Am Sunndaach Noomiddaach steid in Dengmerd widder e besunneri Veraanschdaldung. De Ess-Wee-Err, was unser benachbaarder Fernsehsender iss, der laad doo zum Tanze inn. Unn doodefier iss nadierlich graad unser Staddhall es richdische Plaschder, weil mer doo uff dem gladde Boddem besunnerschd elegante Pirouedde dräke kann. Wammer noo dem Plakaad geht, doo musses doo ziemlich tembramendvoll zugehn. Sogar die Indriddspreise sinn schunn gepeffert. Awwer doodefier gebbds joo aach Esse unn Trinke inklusiewe. Unn wammer Luschd hadd, kammer sich vun de Profis zeije losse, wie mer gekonnt es Danzbään schwingt, wie mer so aanschaulich saad. Ich wunnere mich nur, warum doo immer nur vun ähnem Bään die Redd iss. Ich hann schunn midd alle zwää Bään genuch Huddel fier nidd hinsefalle. Ich hann mir saan losse, dass das e fisikaalisches Probleem iss. Unn sesammehängt midd der Schwärkraft unn der Fliehkraffd. De Fachmann schwäddsd aach vun der Träghääd der Masse. Ich vermuude mool, dasses desweeje aus taggdische Gründe aach beser iss, wammer sich erscht hinnerher, noom Danze, am Büffee unn am Kuche vergreift. Unn doodezu gebbds dann e Heissgetränk noo perseenlichem Gusto: Tee odder Kaffee. Das iss aach de Tiddel vun derer Fernsehsendung. Aangeblich soll mer joo, je noodemm was doo jemand am liebschde trinkt, uff dem sei inneri Instellung schliese kinne. Tee iss eejer ebbes fier ruuische Tüpe, während de Kaffee die Leid uffpuddschd. Awwer wie ich das meinem Freind Schorsch gesaad hann, dass ich naachds nidd schloofe kinnd, wann ich so spät noch Kaffee trinke, doo hadd der gemennd, bei ihm wärs umgekehrt: Wann er naachts schloofe wird, doo kinnd er kään Kaffee trinke.