Hann Sie eichendlich ihr Ooschdereijer schunn all gefärbt. Das iss joo e scheeni Tradizioon, wo jedds aach widder verstärkt gefleecht un an die näägschde Genrazioone weidergebb werrd. Unn doo kumme manchmool richdisch dolle Kunschdwerke eraus. Unn die brauch mer joo dann aach nimmeh se verschdeggele, die kammer ganz stolz herzeije. Midd dem Verschdeggele vunn de Oschdereijer iss das sowieso so e Sach, weil mer sich joo die Stell genau merke muss. Sunschd kanns passiere, dass mer im näägschde Joor im Unnerholz uff exoodische Variande stoost. Es gebbd awwer neierdings Kinschdler, wo die midd Schoggfaarwe knallbunt aanmoole, sogar in lila unn gifftgrien. Doo kann das nidd passiere, dassmer se iwwersieht. Was awwer die Genuss vunn denne Eier aangeht, doo isses doodemidd wie midd de Kunschd: es iss zum greeschde Dääl Geschmaggsach. De ään maanse eejer weich unn annere wann se hard gekocht sinn. Unn die ganz hartgesoddene Saarlänner, die duun doo seerscht noch Maggi druffkippe, bevor se sich die Eijer schmegge losse. Apropos abschregge: ich hann jedds gelääs, dass mer bemoolde Eijer noom Koche nidd abschregge sollt. Nidd weil die so zart besaitet sinn, nää, weil dann die Farb nidd inzieht. Wo mer joo nidd wääs, ob die sich midd unsere emfindliche Organe aach verdraad.Unserm Nationaldichder Goethe sei Lieblingsgericht das ware joo hardgekochde Eijer midd Frankfurder Grien Soos. Unn die legger Soos, die war midd lauder frische Kräuter aangemacht, also richdisch passend zur Ooschder- unn Friehlingszeit. Allerdings scheint dies Johr es Friejohr wejje mangelnder Beteilischung vun der Wedderlaache flachsefalle. Unn das schmeggd emm dann iwwerhaupt nidd.