| 21:11 Uhr

Kolumne Sarmòò
Denne kennschd duu aach!

FOTO: SZ / Robby Lorenz
Das Saarland ist ein kleines Bundesland, in dem man meint, eigentlich müsste jeder jeden kennen. Wohin das führen kann, gerade wenn man einen einmal nicht persönlich kennt, analysiert heute Georg Fox.

Es Saarland iss e Dorf!, saan se als, unn dò kennd mer sisch ääwe. „Kenne“ - das iss so tibbisch saarlännisch. Bei uns kennd mer sisch aus unn mer kennd sei Leid! Mansche menne soggaar, mer missd all Leid kenne. „Denne kennschd duu aach! Denne muschd duu doch kenne!“, heischds dann. Wann mer ääner nidd gudd kennd, saad mer: „Kenne iss sevill gesaad, isch hanne mò gesiehn, awwer nidd aus der Näh!“ Wann mer ääner „gudd“ kennd, danne  hadd mer sei Neddswerg. Awwer das kennd mer jò! Das iss e bissje annerschd, wie wann mer vun Gemauschel schwäddse gääd. Dò gebbds ääwe die schbedsjell saarlännisch Filsegrafie, woo ään Hand die anner wäschd: Machschd duu mier mò ebbes, dò haschde bei mier ebbes dse gudd! Das gehd vum äänfache Tibb, was mer wie woo mid wemm mache kännd, bis kurds vòòre Beschdeschung.



Am beschde iss allewei, mer kennd ääner, woo ääner kennd! Neggadiev kennd mer aach sei Leid: „Däär haddse bei mier noch im Sals leie!“, saad mer, wann mer mid äänem noch e Reschnung offe hadd. Hadd ääner e grummes Ding gedrääd, woo mer wääs, danne hadd mer vun ääm noch e Leisch im Keller leie. Veleischd kann mer se irjendwann nuffholle, wääs mers? All Beamde misse jeed Jòhr unnerschreiwe, dasse ihr Neddswerg nie im Lääwe agdewiere. Was soll isch dier saan: Immer widder kummds doch vòòr unn dann holle se ääner häbb. Meischdens gridder awwer nuur e Riffel, dasser so Firds lasse soll.

Mer heerd aach schummò: „Lehr misch denne nidd kenne!“ Dò wääs mer genau, dasses e glääner Figgediewes iss. Das Gudde iss: Es kummd alles raus, meischdens seminneschd, weil all Saarbrigger odder all Haschborner, all Aarweider vum Ford odder all Schullehrer sisch unnernanner kenne. Wann de awwer iwwer e annerer saaschd, dass de denne nidd kennschd, danne grischde die gans Fammilje uffgedsähld. Unn dòòdedsuu aach noch, woo demm sei Onggel wohnd unn dass demm sei Vadder uffem Amd geschaffd hadd unn dass sei Kinner Freggerde sinn unn niggs dauche. Unn wann mer danne ääner immer noch nidd kennd, danne saad mer veleischd aam Schluss, dass mer ne doch kennd, nuur dasses Ruh gebbd, selbschd wann mer ne gaar nidd kennd! Wunnerd mer sisch jedds noch driwwer, dass die Saarlänner menne, all Leid gääde sisch unnernanner kenne?



Georg Fox schreibt in rheinfränkischer Mundart und in Hochdeutsch.