Meischd midd so amuröse Sinnsprich debei, die wo dann anfange mit: Liebe ist, wenn … Unn dann mussmer sich seins debei denke. De scheenschde Spruch, wo ich in der Beziehung gelääs hann, das war e ganz tiefsinnischer: Liebe, das heischt uffwärts falle. De Valentinsdaach hadd iwwrischens iwwerhaupt nix se duun middem Karl Valentin, doodefier iss das e vill se ernschdi Sach. Dann schunn eejer middem Valentino Rudolf, wo friejer weeje demm seinem gliedische Bligg die Fraueherze joo glei reijeweis dahin gescheschmolz sinn, wie mer so scheen saad. Apropos geschmolz: Schoggelaad werrd aach gääre verschenkt an dem Daach. Vor allem dann, wann de Blumelaade schunn zu iss, wanns emm hinnerher dann doch noch infallt.

Passend zu dem Thema gebbds in der Stadthall am Dienschdaach e Theaterstigg mit dem erstaunliche Titel: Männer gesucht. Wos laut Vorschau um die gewerbsmääsische Anbahnung vunn zwischemenschliche Kontaggde geht. Normalerweis sinns in de Komödieje joo eejer die Männer, die wo hormonell uff die Pirsch gehn. Unn das nidd unbedingt immer im eichene Revier. Ganz friejer isses doo joo noch wesentlich romandischer zugang, zum Beispiel in denne beliebde Heimatfilme. Noo der Devise: Errötend folgt er ihren Spuren. Meischt aach noch middem Revierferschder perseenlich.