Die Wissenschaft hadd joo schunn vill rausgefunn. Warum die Banane krumm sinn und wie lang mer de Kobb unner Wasser stegge kann, bevor mer kää Luffd meh kried. Unn warum in der Naas Hoor wachse, wo mer joo middem Loggewiggler iwwerhaupt garnidd hinkummt. Awwer zu de greeschde noch ungeleesde Rätsel geheerd es Fäänomeen, dass vun ääner Minudd uff die anner die Schlissel weg sinn. Die misse iwwer Fähischkeide verfieche, wo e Trigg debei iss. Unn so ebbes kann ganz scheen peinlisch werre, wammer pleddslisch vor der eichene Hausdier steht unn nimmeh ninn kann. Unn ganz scheen deier werrd das aach noch, wammer so e Schlisseldienschd kumme lossd. Es gebbd sogar Leid, woo uff dem weide Feld des Verstruddelns zur Hochform ufflaafe kinne. Mei Freind Schorsch zum Beispiel, der bringts aach midd Schlissel gladd ferdisch unn wääs nimmeh, wo er uff dem Rieseparkpladds sei Audo hingestellt hadd. Nur ään Gligg dasses doo an denne moderne Audos so e Blinkaanlaach gebbd. Doo kanner druffdrigge unn sei Roschdlaub blinkt freelisch serigg. Das iss hald das gudde an der Technigg. Awwer dass die aach ihr Schaddeseide hadd, das erlääbt mer im Dengmerder Schwimmbaad. Doo hannse fier die Umkleidekabiene e ganz raffinierdes Süschdeem entwiggeld. Mer suchd sich irjend so e Spind aus, wo mer sei Gelumbbs ninmacht unn de Schlissel merkt sich dann die Nummer ganz audomaadisch. Das iss joo e feini Sach. Nur hadd mer spädeschdens dann e massiwes Probleem, wammmer sich selwer die Zahl nidd gemerkt hadd. Do helft dann nur ääns: mer stellt sich nommool unner die kalt Braus bis emm vor Schregg die Nummer widder infalld.