Am Samschdaach gebbds widder e besunneri Veranschdaldung fier Kinner. Mer wääs joo, dass die Juuchend vun Naduur aus vorwiddsisch iss unn gääre forscht. Unn wo kinnd se das besser als wie im Forschd. Also gehts in dem Fall uff e Fleddermauswannerung. Seerschd hann ich mich als Vochel joo gesträubt iwwer so ebbes abaardisches se schreiwe wie Meis wo flieje kinne.Awwer nix weggd joo die Neigier so, wie Kreeaduure, wo sich gääre versteggele unn am liebschde in Heele hause. Unn wann sich das ganze noch naachds im Dungele abspielt, dann umso besser. Dass das e bissje grusselisch iss, das das duud de Reiz vun der Sach joo noch erheeje. Doodruff hannse schunn in der Filmbranche speggulierd, wo in de Krimis unn de Horrorfilme immer so moolerisch die Fladdermeis erummfladdere. Vorzuchsweis in alde verfallene Schlesser unn Gemäuer, wos dumpf ausem Keller teent: Hier spricht Edgar Wallace! Komischerweis gebbds sogar e Operedde vum Johann Strauss, wo das Vieh sogar als Tiddelfigur vorkummt. Uff de Fliechel des Gesanges sosesaan. Awwer das Opus hääscht nur so, weil sich doo ääner mool als Fleddermaus verboozt hadd. So wie das annere weltberiehmde Exemplar, das wo doo uff der Leinwand erummfladdere duud. Der iss aach immer verboozt unn hadd so e kloores Koschdüüm midd spitze Ohre umme Strambelheesje aan. Warum wääs mer eichendlich nidd so richdisch. Uff jeede Fall duud er laufend die Welt redde. Nadierlich nidd laufend, eejer so im Tieffluuch. Awwer die Kinner sinn uff denne Bettmänn doo ganz wild. Dass emm so e Figur e bissje iwwerspannt vorkummt, doo soll mer sich nidd drann steere. In der Fledermaus vum Strauss kommt jo aach e Frosch vor wo gar kääner iss.