Geheimnisvolle Gebäck-Rückkehr

Kreis Neunkirchen. Sie hadd verzehld: Es war in der Zeid, wo mir Kinner noch jung unn läddisch ware. Mer hann noch all sesamme midd unsere Elldere unner aam Dach gewohnd. Im Fahrwääch. Es war noch voorm Erschde Weldgriech. Es Haus war nädd aarisch groß. Aanschdäggisch, unnerm ganze Haus dorsch e gewälbder Keller. De Hausinngang war sellemools noch ganz linggs an de Frond

Kreis Neunkirchen. Sie hadd verzehld: Es war in der Zeid, wo mir Kinner noch jung unn läddisch ware. Mer hann noch all sesamme midd unsere Elldere unner aam Dach gewohnd. Im Fahrwääch. Es war noch voorm Erschde Weldgriech.Es Haus war nädd aarisch groß. Aanschdäggisch, unnerm ganze Haus dorsch e gewälbder Keller. De Hausinngang war sellemools noch ganz linggs an de Frond. Grad aus, iss mer in die Kich komm. Dorrd drinn rechderhand die Dier eninn, war de Elldere ihr Schloofschdubb. Noo voore, de Schdrooß zu, war die guud Schdubb. Das war de greeschde Raum im Haus. Abgesiehn vunn de drei große Schduwwe unnerm Dach. Die hinnerschd Schdubb, die muss mer sich kwäär iwwers Haus voorschdelle, war meeh odder wenischer e Abschdellraum. Die annere zwaa Schduwwe, midd de Dachschrääche bis uff de Boddem, war aan de Maade ihr Schloofschdubb, die anner hann sich die drei Buuwe gedaald.

Wies ieblich unn Brauch iss hann unser Elldere aach in de Addwändszeid, so noo unn noo, ihr Weihnachdsguuzje gebaggd. Mir Kinner hanns wie mer noch so klaan ware nädd middgried. Awwer es ganze Haus hadd denoo geroch.

Dasses bis de Heiliche Oomedd guud verwahrd unn uffgehoob iss, hann se s in Blechdose odder was se aach immer gehadd hann, in der groß hinnerschd Schdubb uff em Schbeicher uffgehoob. Die Dier war joo abgeschberrd. So kunnd deene Bläzzjer nix bassiere. De Raum war guud dorchliffd, es kunnd nix schdiggisch werre, unn die Meis sinn aach nädd draankomm.

Es wird geschmückt

De Heiliche Oomedd war komm. De Vadder hadd es Grischbaamsche besorschd gehadd. Jäzzd warer debei fass inn de Guud Schdubb uffseschdälle. Er hadds midd Lamädda, Kuchele unn Kerrze geschmiggd. Die klaane Figgiercher aussem Ärzgebirrje hadder graad dezwische verdaald, doo hadd die Modder iwwer ne geruufd. "Lui, kännschd mer drowwe in de hinnerschd Schdubb die Bläzzjer hoole, ich mache fa die Kinner zwaa Dällere ferrdisch".

De Lui hadds geheerd. Er iss gleich die Dräbb enuff in die Schdubb. Er hadd e bissje geraumd, dasser hinne in de Ägge komm iss, wo es Weihnachdsgebägg schdehd.

Die erschd Doos iss aarisch leichd, hadder gedänggd, unn de Däggel uffgemachd. Läär. Nur uffem Boddem noch e paar Grimmele. Er hadd sich gewunnerd.

Dann isses die anner Doos. Er greifd se unn heebd se hoch, die iss aach so leichd. Er guggd eninn. Nur noch drei Lääbkuche, de Rechd Grimmele. Ei, was iss dann das, hadder gedänggd. Jäzzd hann noch e paar Schachdele doo geschdann. Doo hadder iwwerleed, sull dann es Suffie es Zuggerzeich umgeraumd hann. Das kunnder nädd verschdehn.

Er hadd die Schachdele all noogeguggd, awwer die aan war so läär wie die anner. Awweil war de Vadder awwer schbraachlos.

Doo hadder iwwer sei Suffie geruft, es sull emool eroffkomme gugge.

Ja, es Sufiie hadd am Kichehäärd geschdann unn sich ums Middaässe gekimmerd.

Es hadd seerschd die Haawe nääwehiengezooh, unn iss bei sei Lui uff de Schbeischer. Hadd noch gedänggd, was suchder nur doo owwe, er brauch doch nur die Bläzzjer se bringe. Ach wammer Mannsleid äbbes haaschd.

In de hinnerschd Schdubb huggd de Lui uffeme Hogger. Um sich eromm die lääre Schachdele unn Doose. In de Hand hadder aaner vunn de drei läddschde Lääbkuche. Deene schräggd er seim Suffie änngääe, unn saad: "Komm awweil duun mir zwaa uns emool de Guude aan. Die Kinner brauche nix devunn se wisse".

Wies de Modder in deem Aaueblick war, kunnd mer die Good nädd verzehle.

Es war nädd die Aard vumm Vadder, seine Kinner äbbes voorseendhalle. Unn schunn gar nädd, sei Suffie midd deraardische Schbässjer se iwwerrasche.

Jääzd hann die zwaa doo geschdann. De Baam halwer geschmiggd, es Middaässe schdehd uffem Oowe. Die Bläzzjer sinn verschwunn, unn es iss Heilischer Oomedd. Was sulle mer jäzzd mache?

Woo es Gebäck hienkomm iss, hann se gleich gewissd. Sie hann joo ihr zwaa äldschde Buuwe, zwaa Schlizzohre, es bäschd gekännd. Die hann, so hadd sichs schbääder erausgeschdälld, gewissd, wie mer die Dier uffgried. Unn hann es Guuzje midd ihre Geschwischder ehrlich gedaald.

Jammere odder schille hädd jäzzd nädd gehulf. De Vadder hadd uff de Heilische Oomedd misse voorenaus gehn, bei Zenziusse Marieche.

Das hadd midd seiner Schwäschder e Kolonialwarelaade gehadd. Hinne eromm hadder misse klingele. Unn all das kaafe wassem die Modder uffgedrah hadd.

Wie er hamm komm iss, hann sich die zwaa gleich middnanner draan gemachd, unn frisch gebaggd. Was wär dann e Heilischer Oomedd ohne Weihnachdsguuzje.

Unn sie hanns noch geschaffd, bevoor mir Kinner haamkomm ware. Mir hann bei de Bescheerung nur große Aaue gemachd, wie mer die Bläzzjer uff de Dällere gesiehn hann. Es ware nur Lääbkuche unn Ausgeschdochenes droff. Fa meh hadd die Zeid nädd gelangd.

Kaans vunn uns Kinner kunnd verschdehn wieso bläzzlich das Gebägg doo war.

Wo das vum Schbeicher hienkomm war, das hammer joo gewissd.

Sull dann es Grischkinnje das doo gebrung hann?

Als sei nichts gewesen

De Vadder unn die Modder hann sich nix aanmerge gelossd, unn sich draangeschdälld, als wann nix gewehn wär. Das hadd uns Kinner aarisch gewunnerd. So hadd mei Good verzehld. Es hadd sich awwer aach kaans vunn uns gedraud irgend äbbes se sahn.

Wie hadd die Good noch zu mer gesaad, wie se ferrdisch war midd verzehle: "Wammer Kinner hadd, kammer nädd genuuch uffbasse. Wann aam dann drozzdeem noch so äbbes bassierd, iss mer doch sellwerd schuld."

Meistgelesen
Neueste Artikel
Zum Thema
Aus dem Ressort