Dass in der Zeid, wo die Nächde länger werre, aach die midd de längere Fingere verstärkt uff Tour sinn, doodevor hadd joo die Bolizei schunn ausgiebisch gewarnt. Awwer jedds, wanns drause duuschder unn schummrisch iss, zeichne sich aach einische Verkehrsteilnehmer durch faschd schunn krimineller Leichtsinn aus. Unn bringe annre Leid unn vor allem sich selwer ganz bees in die Bredullje. Wammer mool selwer erlääbt hadd, wie so e Exdreemsportler oowends um halwer zehn ohne Licht durch e Innbahnstroos gepeest kummt, doo wunnert mer sich, dass doo nidd effder ebbes passiert. Anscheinend werre die Rääder heid schunn gar nimmeh midd Licht odder Bremse gebaut, weil das als unkool gilt. Die äänzisch Sicherheitsmaasnahme iss in dem Fall offensichtlich de Schutz vun der Dunkelhääd. Awwer aach ganz unne in der Haggordnung bei der Stroosebenuddsung gebbds Probleemfäll. Doo hann sich manche zwääbäänische Verkehrsteilnehmer de Summer iwwer ebbes aangewehnt, was im Winter bees ins Au gehn kann. Die gehn äänfach seeleruuisch iwwer die Stroos, woomeeschlich noch diagonal unn bei Rot. Unn achte awwer strikt doodruff, dasse nur joo nidd hinner sich gugge, ob doo eventuell e Audo um die Egg kumme kinnd. Das iss, wanns oowends hell iss, normalerweis kää Probleem, weil derjeenische sich druff verlosse kann, dass mer ne vun weidem schunn sieht. Awwer im Winder, wammer im schwarze Mandel drause rumm laafd, wanns stark dunschdisch bis newwelisch trieb iss, doo verbrauche die e ganzes Geschwaader vun Schuddsengele. Mer will joo nidd unbedingt behaupte, die Audofahrer wirde kää Fähler mache. Awwer graad in der uniwwersichtlich Johreszeid doo reimt sich Riggsicht uff Rigglicht.