Am Wochenenn kammer sich bei der Ausstellung in der Stadthall widder die steinerne Koschdbarkeide aangugge, odder Preezioose, wie mir Besserverdiener saan. Die wo sich das nidd leischde kinne, schwäddse doo despekdierlisch vun Klunkere. Doo kammer mool widder siehn wie reladief alles iss. E Stään im Schuh iss zum Beispiel ebbes was emm schwäär nervt, awwer e scheener Stään am Ohr odder an annere exponierde Kerperdääle schmüggd ungemein. Unn es besteht joo nadierlich aach e riesischer Unnerschied zwische hochkaräädisch unn hochkandisch. E unangenehmi Sord vunn Stään sinn joo die wo emm im Wää leije, die sogenennde Stolperstään odder Waggese. Weil das unser Beweeschungsdrang bremst, reesche sich die Leid doo gääre driwwer uff. Obwohls joo eichendlich zur Beruuischung vum Verkehr diene soll. Wasse awwer in der Stadthall aach noch ausstelle, das sinn die Stään aus der Urzeit, wo noch die Fossilje drinnstegge. Das sinn so versteinerde Abdrigg vun dem Viehzeich, was friejer hie erumgeschwumm iss. Weil bei uns die Geeschend doomools so voll Wasser war, dass mer doo direggd hädd kinne koschdeloos Strandurlaub mache. Annere Stään wo aach schunn e Haufe Johre uffem Buggel hann, sinn die Grenzstään odder Bannstään. Die waare friejer furchtbar wichdisch, weil mer doodraan gesiehn hadd, zu wellem Duodezferschd das ganze Terräng odder de Wald iwwerhaupt geheerd hadd. Unn in der Beziehung hann die sellemools joo iwwerhaupt kää Spass verstann. Die Spitzbuuwe, die wo so Stään heimlich verriggd hann, die sinn ganz grauslisch bestraaft worr. Friedlicher gehts doo zu uff der Wanderung uff dem Grenzstäänwää, wo se fier demnäägschd rund um Dengmerd erumm geplant hann.