Scheener Schein

Scheene Scheine gebbd's: Heilischescheine, Urlaubs-, Fihrer-, Jachd- unn Geldscheine. De Sunneschein unn im Winder de Schein vum Kaminfeier in dá waam Schdubb… Scheind alles scheen uff sei Aad

Scheene Scheine gebbd's: Heilischescheine, Urlaubs-, Fihrer-, Jachd- unn Geldscheine. De Sunneschein unn im Winder de Schein vum Kaminfeier in dá waam Schdubb… Scheind alles scheen uff sei Aad. Bloos: Had nidd mei Oma gesaad, má misd meh sinn wie scheine? Mid finf Jòhr waa mir nidd glaa, was de Sinn solld sinn vum "meh Sinn", isch hann hald noch geglaabd, wenn ebbes "so" scheind, misd's ach "so" sinn.

Nidd bloos Schein is: Faasenaachd wär forr misch längschd Schnee vun gischder. Hädd isch nidd grad eewe per Zufall - hinnenòò wie die ald Faasenaachd - e Narrewaache gesiehn, in rá Hall aam unn váloss abgeschdelld, wohl uffgehob forr Mikarääm in Loddringe. Uff äämòò erscheine vòr meine innere Aue die Rosemondaasziisch, wo isch als Gnirbs zugeguggd hann. Frehlische Leid, bund wie e Faabkaschde mid Gold, Silwer, Gliddsergròòm. Brins, Brinsessin, närrischer Hofschdaad, jede Menge Mussig, bräschdische Kudsche mid Päärde, riesische Brunkwaache unn dezwische Schwellkäbb. Guddsjer, sunschd immer so gnabb, had's geräänd. So gudd, so scheen. Scheener Schein hald. Isch waa hin unn weg. Dann is de Bligg schärfer worr. Schad! Gold unn Silwer waa nidd eschd. Bei de Schwellkäbb forr durschsegugge e Finschder im Hals! Es Narreschiff waa drunner e LKW forr Sand unn Schdään. Am Schdròòsebahndeboo sinn mòò die Päärde durschgang. Guddsjer had's nidd wirglisch geräänd, unn scheene Sache had má vum Waache runner gudde Bekannde perseenlisch in die Hand gedriggd. Schbääder sim'má im Fernsehn ach Bidderedde bekannd vòrkumm, aach geschummeld, weil nidd immer kombledd selbschd erfunn.

Irjendwann waa má glaa: Vòòre hui, hinne, na ja, nidd grad fui, awwer doch ofd meh scheine als sinn. Zum Gligg had's im rischdische Läwe gans annerschd solle sinn: Reell unn gereschd. Mid Leid owwe, wo wisse, wo's lang gehd in Wirdschafd unn Pollidigg, immer im Dreiwe forr's Gemeinwohl, nidd bloos forr in de eischne Sagg unn forr ihr Amigos. Wer was leischd, gridd unn werrd ach ebbes. Unn dann? Schwellkäbb ach dord, vill Lufd, wenisch Hirn, niddmòòls e Guggschlidds im Hals. Unn gehn die Päärde dursch, halld se känner. Ach dòò also ofd bloos scheener Schein! Das se begreife is schwärer se schlugge wie die haamlos Fasenaachds-Mogelei. Dann bisch de älder unn sischer, alles wär Luuch unn Druuch. Bis dá, wenn de Gligg haschd, infalld: Du selwer geheerschd aach dezu. Wie die meischde Leid,wo wohl nidd immer Engel sinn, awwer bloos deiwelisch eewe aach nidd.

Dann ahnsch'de: Wer uff die wirglisch grumme Hunde runnerguggd, kinnd ach mòò bescheide uff die linse, wo sisch mid vill Mih e Heilischeschein vádiene wolle. Noch e paa Jòhr schbäder wunnerd's disch, was forr Fubbes disch frihjer uffgereeschd had. Debei freie sisch dei Zähn, wenn de bei de Guddsjer läär ausgehschd. Unn is e Bidderedd abgekääsd, dann ofd bei ännem, wo aach abgekääsd had. Haubdsach, de lachschd, nidd bloos zum Schein, bevòr dá es Lache gans vágehd. Lach noodfalls iwwer disch selwer! Annerschd gesaad: Wer nidd gridd, was'á will, muss hald wolle, was'á gridd. Genauso wie ach beim Ooschderhas! Wenischdens so scheine muss'es. Scheen, odder?

Peter Eckert, aufgewachsen in Saarbrücken-Burbach, lebt seit 1972 in Wadgassen-Differten. Letzte Mundart-Veröffentlichung war der Asterix "Die Sischel vun Gold".

Meistgelesen
Neueste Artikel
Zum Thema
Aus dem Ressort