Im neije Gewerwegebiet werrd demnäägschd an zwää Stelle de Kreisverkehr vegetazioonsmääsisch schwäär uffgemeewelt. An dem ääne wolle se sogar Bambus uffzieje, weil sicherheitstechnisch einheimische Helzer zu gefährlich wäre. Ei warum nidd. Bambussprosse solle joo gesund unn schmagghaft sinn. Unn wann dann hie die erschde Pandabääre ufftauche, kried die Biosphäre vielleicht ball e neijes Logo. Nää, awwer im Ernscht, das Ganze soll joo sogar simbolisch sinn. Unn doo passt Bambus prima in die heidische Zeid. Weils e flexibles Pflänzje iss, wo sich bei Sturm elegant wegduggd, woo awwer nidd glei gekniggd iss, wanns mool brenzlich werrd. Odder wie e chinesisches Sprichwort saad: Nach dem Sturm erhebt sich der gebeugte Bambus. Uff dem annere Kreisel wolle se Hopfe aanbaue. Das hädd schunn mool de Vordääl, dass mers vunn weidem sieht. Unn das wär aach nidd ohne Hinnergedange. Dengmerd iss joo als Bierstadt bekannt, unn dann werrd Hopfen joo in der Medizin als Beruuischungsmiddel inngeseddsd. Bierdringer hann vunn Naduur aus schunn so ebbes gemiedliches unn sinn joo sprichwerdlich ruhische Zeidgenosse, die wo sich nur uffreesche, wann se nidd wisse, wohin middem Leergut. Dewesweeje saad mer joo aach: Hopfen unn Malz, Gott erhalts! Wisse sie iwwrischens wo de Ausdrugg: Es iss Hopfen unn Malz verloor herkummt? Weil se friejer es Bier meischd selwer dehemm gebraut hann, unn de Hopfen e furchtbar empfindliches Gewächs war. Unn doo iss ganz oft ebbes schief gelaaf, unn dann hadd mer kinne alles wegschmeise. Doo kammer nur hoffe, dass bei der gudd gemennd Akzioon alles so gladd laafd, wie se sich das vorgestelld hann. Unn dass die Kreisele e rundi Sach werre.