Ich lääse joo besunnerschd gääre unn intensief - schunn aus berufliche Gründe - die Iwwerschriffde in der Zeidung. Weil mer doo ganz uff die Schnelle e Iwwerbligg doodriwwer kried, wies in der Welt so zugeht. Unn doo gehts manchmool zu, kammer nur saan, wie bei Hempels unnerm Sofa. Unn desweeje nennt mer die joo aach vellisch se recht Schlaachzeile. So wie mer joo aach oft saad e Schlaach ins Kondoor odder e Schlaach in de Nagge. Manchmool kummts joo so knibbeldigg, dass mer am liebschde gar kää Nachrichde meh gugge will. Neilisch hann ich e treffendi Karikadduur gesiehn, wo ääs vorm Fernseejer huggd unn ganz uffgereescht ruft: E neiji Finanzkrise! Doo zieht er resoluuud äänfach de Stegger aus der Doos und mennt ganz drogge: Jedds nimmeh!Wann emm mool de Nooschub an Horrormeldunge uff de Maache schlaad, doo lääst mer dann am beschde die Rubrigg iwwer die heile Welt vun de Prominende odder de Royals. Odder noch besser glei die Gesundhäädstipps. Weil Gesundhääd joo es allerwichdischsde iss. Unn doo erfahrt mer dann so umwerfende Erkenntnisse, wie die, dass Komödie gesinder sinn als wie Krimis. Das iss e erfreilischi Nachricht fier all die wo sunschd zum Lache in de Keller gehn. Unn dann noch mei Lieblingsmeldung: Deutschland auf dem Gipfel des Glücks! Was will uns de Chronist doodemidd saan? Die Leid reeche sich zwar dauernd uff, awwer se sinn sefriede. Vielleicht sinn se aach desweeje sefriede, weil se sich reechelmääsisch uffreeche kinne. Doo wääs mer weenischdens was mer hadd unn wie mer de niddrische Bluuddrugg hochschnerre losse kann.

Also wie gesaad, aus der Zeidung kammer vill leere. Unn neilich hadd sogar drinngestann: Wer lernt lebt länger.