| 21:16 Uhr

Verbinnendes unn Trennendes

Die Finanzkrise treibt joo manchmool die sonderbarschde Bliede. Jedds iss unser Stadtowwerhaupt sogar schunn uff die tiefschürfende Idee kumm, fier im Raadhaus Spaade aansebaue. Wo ich doch schunn bei dem Ausdrugg Kubbelsaal immer e bissje sesammezugge. Wahrscheins iss das awwer e Berufskrankhääd, dass ich sprachlich so iwweremfindlisch reagiere

Die Finanzkrise treibt joo manchmool die sonderbarschde Bliede. Jedds iss unser Stadtowwerhaupt sogar schunn uff die tiefschürfende Idee kumm, fier im Raadhaus Spaade aansebaue. Wo ich doch schunn bei dem Ausdrugg Kubbelsaal immer e bissje sesammezugge. Wahrscheins iss das awwer e Berufskrankhääd, dass ich sprachlich so iwweremfindlisch reagiere. Meischd sinn joo so werbaale Ungereimthääde nidd bees gemennd, sie wirke nur ungewollt e bissje komisch. So wie jedds bei dem dolle Sängerfeschdiwall am Sunndaach. Wo uff der Biehn e Transparend gehängd hadd unn doo hadd druffgestann: Kreischorverband. Im erschde Momend hädd mer kinne menne, dass doo jemand e Ohr werrd gelallt krien odder noch schlimmeres. Awwer das wär nadierlich e vellisch falscher Inndrugg, weil die doo werklich prima gesung hann unn es Publikum ganz vunn de Sogge war vor Begeischderung. Vielleicht hädd in dem Fall e Bindestrich an der richdisch Stell schunn geholf. Weil Gesang an sich joo ebbes Verbinnendes hadd, wie mer bei der Veraanschdaldung scheen gesiehn hadd. Apropos Bindestrich: Mer schreibt iwwrischens Saarpfalz-Kreis unn nidd Saar-Pfalz-Kreis. Noch verdraggder iss die Sach awwer midd denne Trennungsstriche. Besunnerschd seid die vum Kommbjuuder audomaadisch geseddsd werre. Unn dem Abbaraad iss das vellisch schnurz, was er doo als fier e Bleedsinn fabrizierd. Dass zum Beispiel in der Rubrigg Spielwaare de Plüscheisbär hinnerm Plü getrennt werrd. Odder im Gaardebau-Proschbeggd die Blumento-Pferde ufftauche, midd denne wo se uns schunn als Kinner hann wolle veräbbele.Unn weil so abstruse Konschdruggzioone oft richdisch weh duun, schwäädsd mer in soome Fall vun Trennungsschmerze.