Im Januar, wann es Johr noch frisch unn ausbaufääisch iss, doo stehn Land uff Land abb die Neijohrsemmfäng uffem Terminplan. Weil se allerdings in manche Städd finanziell Land unner gemelld hann, sinn dort die Emmfäng dies Johr weeje akuuder Klammhääd abgesaad worr. In Dengmerd naddierlich nidd. Das wär joo aach schaad, weil mir nämlich in de Emmfangsräum vunn unserer Stadthall so e repräsentatief hoohi Trepp hann. Wo die ganze Prominende ausem effendliche Lääwe, aus Bollidigg unn Wertschaffd enuff defiliere kinne. Dass hadd direggd faschd e feudaler Aanstrich unn passt ganz genau zum Dreikeenischdaach. Unn de Saal war joo aach entsprechend feschdlich deggorierd. Wann die geladene Gäscht owwe aankumm sinn, sinn dann ausgiebisch die Hänn geschiddeld worr. Unn doo isses dann schunn mool vun Vordääl, dass nidd graad e Gribbewell im Anmarsch iss. Es geht joo bei so Aansammlunge in erschder Linije mool doodrumm, dassmer sich sieht unn dassmer gesiehn werrd. Unn middenanner ins Gespräch kummt. Mer muss halt schwäddse midd de Leid, wies so scheen hääscht. Awwer dass die Sach nidd zum reine Vergniesche ausartet, desweeje gebbd das Ganze als Steh-Emmfang abgewiggeld.Unn dann verwannelt sich die Stadthall in e Auditorium. Weeje de ganze Aansprache, wo e Panoramabligg geworf werrd uff die allgemeine Grooswedderlaache. Seerschd serigg, awwer meeschlichst nidd im Zorn, uff das was gewään war. Unn dann stramm noo vorre in die Zukunft. Wo mer eichendlich noch nix genaues wääs, awwer schunn vunn amtsweeje e optimisdischer Ton aanschlaan muss. Unn fier denne Fall, dass die Aussichde eejer durchwachse sinn, doo gebbds joo e segensreichi Erfindung: die gudde Vorsädds.