Ware Sie aach schunn im Wald unn hann fleisisch Pilze gesammelt? Es iss nämlich jedds widder die Säääsong, wo mer in die Pilze geht, wie mer so scheen saad. Vermutlich, weil mer direggd middedrinn stehn muss, bis mer se sieht. De gemeine Pilz iss nämlich e ziemlich scheues Gemies, graad weiler joo so e gesuchder Leggerbisse iss. Wo sich gääre im Unnerholz versteggelt, dass merne nidd find. Fier Leid, wo se faul sinn zum Suche, gebbds joo noch die Zuchtpilze. Awwer glaawe se nur nidd, dass ich mich hie zu einschlägische Kalauer hinreise losse werrd. Vunn weeje die beschde Pilse werre nidd gezüchtet, die werre gezischt unn gezabbd. Doodefier iss das Thema vill se ernschd unn aach nidd ungefährlich. Awwer zum Gligg gebbds joo Spezialischde, die wo sich doodemidd auskenne unn denne wo mer sowieso am beschde es Pilzesammele iwwerlossd. Das ganze iss nämlich e Wissenschaffd fier sich. Erschdens duun die klääne Kerle zur Zeit joo bekanntlich iwwerall ausem Boddem eraus schiese. Unn wammer se dann endlich midd Mieh unn Nood in der Pann gebrood unn uffem Teller hadd, awwer die Portion nidd ganz paggt, doo derf mer se um Himmels Wille nimmeh uffwärme. Das wär schlecht fiers Verdauungssischdeem, so hammers noch vun der Oma geleert. Noch unverdaulischer sinn awwer e paar besunnere Kandidaade, wo mer leicht midd de geniesbare verwechsele kann. Unn iwwer die Folge vun soome Irrduum kursiere joo die makaberschde Storries. Dass zum Beispiel im Reschdorang e Hinweisschild hänge werrd, es Personaal wär angewies, bei Pilzgerichde vorher se kassiere. Odder dass de Geddergadde noom Esse frood: wo hasche dann das Rezebbd fier die leggere Pilze her. Ei Schatz, ausem Krimi.