Scheen geschmiggde Weihnachtsbäämcher
Das iss joo noch mool gudd ausgang midd unserm frischgebaggene Dengmerder Weihnachtsmarkt am ledschde Wochenende. Wo se doch am erschde Daach denne wieschde Sturm aangekinnischd gehadd hann unn de groose Baam vor der Kerch sich kurzfrisdisch in e Zidderpappel verwannelt hadd. Es sinn awwer nur e paar Kuchele runnergefall unn se hann dann ganz schnell widder neije draangehängt
Das iss joo noch mool gudd ausgang midd unserm frischgebaggene Dengmerder Weihnachtsmarkt am ledschde Wochenende. Wo se doch am erschde Daach denne wieschde Sturm aangekinnischd gehadd hann unn de groose Baam vor der Kerch sich kurzfrisdisch in e Zidderpappel verwannelt hadd.Es sinn awwer nur e paar Kuchele runnergefall unn se hann dann ganz schnell widder neije draangehängt. Dass mer nidd saan kann, die Dengmerder häddese nimmeh all am Chrischdbaam. Unn wie sich de Sturm geleed hadd, sinn dann aach die Besucher masseweis gestreemt. Aach wann es Wedder graad nidd so war, wie mer sich das fier Weihnachde im Idealfall winscht. Ich saan joo immer, im heilische Land hadds sellemools aach eejer weenisch geschneit. Ersatzweis kammer joo dann in unsere Breite, falls die weiße Pracht noch uff sich waarde losst, leis die Musigg riesele losse. Odder simbolisch es Bäämche weiß behänge.
De Schauspieler Albin Braig, wo in der Serije Hannes unn de Birjermeischder de Gemeidebote spielt, hadd graad vor e paar Daach imme Interwiuu verzählt, dass er bei sich dehemm die verantwortungsvolle Aufgaab des Lame(n)ttierens hädd. Er werrd nämlich denne Baam ganz akkuraad so voll midd Lametta behänge, dasser am Enn faschd wie e Trauerweide aussieht. Unn wahrscheins singe se dann Oh du Fröhliche!
E Zeile ausme Loriot-Sketch iss joo mittlerweile schunn zum gefliechelde Wort worr: Friejer war meh Lametta! Heidsedaachs sieht mer, was de Baumbehang aangeht, joo ziemlich ausgefallene Faarwe, Awwer wie die einheimische Dengmerter gääre saan: Es iss mool ebbes anneres. Obwohl mer joo graad bei so feierliche Aanläss am liebschde sei Gereescheldes hadd. Jeed Johr widder unn jeed Johr widder genauso scheen.
