Leddsch Wuch hann sich aktive unn ehemaalische Georgs-Pfadfinder in Dengmerd getroff. Doo iss aach e voluminöösi Doggumentazioon iwwer denne ihr Geschischd vorgestellt worr. Unn wie immer, wammer Bilder aus friejere Daache betrachde duud, doo kammer in Erinnerunge schwelche. Unn dass die Erinnerungsstigge nidd verloor gehn, iss jedds sogar e Pfadfinder-Museum im Gesprääch. De Pfadfinder ihr Moddo iss joo: An jeedem Daach e guddi Taat. Unn zwar hauptsächlich in Bezuuch uff annere. Wammer sich nämlich selwer de Gudde aanduud, doo zählt das nidd. Wobei das ääne das annere joo nidd unbedingt ausschliese muss. Wammer nämlich annere e bissje unner die Arme greife duud, doo wirkt sich das joo erwiesenermaase aach positief aus uffs eichene Wohlbefinne. Ich selwer war joo nidd bei de Pfadfinder, awwer wann ich doodevunn lääse odder heere, doo muss ich an denne sinnische Spruch denge, wo mir sellemools als klääner Buub schwäär imponiert hadd. Das war de Wahlspruch vun Tick, Trick unn Track. Die ware die fiffische Neffe vum Onkel Dagobert. Unn weil der immer irjendwie in der Bredullje war, hann die ihne misse widder rausreise. Unn zwar midd der Dewiese: Pfadfinder finden immer einen Pfad. Uff gudd Deitsch: Es gebbd e Leesung fier jedes Problem. Unn die werre heidsedaach händeringend gesucht, so Probleemeleeser. Awwer es Probleem midd denne Leesunge iss joo, dass es erschdens so vill devunn gebbd, dass mer de Iwwerbbligg verliert. Unn dass die scheenschde Leesunge dann widder de meischde Leid nidd werklich schmegge duun.