Kolumne Saarmòò Mach dá mòl e Bild!
Das Fotografieren hat sich im Laufe der Zeit verändert. Was man mit den Bildern allerdings macht, liegt nach wie vor im Auge des Betrachters.
Mach dá mòl e Bild! Ääns? Es Handy machd Hunnerde. Niddmòò aangugge muss má se. Mach dá mòl e Bild sellemòls: Film kaafe, heegschens 36 Bilder knibse. Nòò Wuche Babierbilder aus em Labor. Endscheide: Freid má odder schiddeld má sisch. Dann kläre: Babbd má se mid Fodo-Egge (die ofd ball widder abgehn) ins Album uff Blädder aus grauem Pabbedeggel? Odder leed má se eerschd mòò bei „die annere“ in e Schuhkaddong? Mi‘m ehrlische Vòrsadz, dass má se späder(„im Winder, wenn Schnee leid“) scheen innklääbd. Unn dann werd’s nix, weje Schneemangel. Odder grad weje Winder unn Schnee is schregglisch vill anneres se duun. Gudd, in Ausnahmefäll solle ach Leid, ob Schnee odder nidd, Bilder tadsäschlisch inngeklääbd hann.
Mach dá mòl e Bild! Odder loss es mache, e Atelier-Portrait beim „rischdische“ Fodograf. Stillhugge, Kobb hoch, links Schuller bisje vòr, wischdisch gugge an de Scheinwerfer vòrbei, Kobb sereschdgeriggd krien. Dann bei Erwachsne „Bitte recht freundlich“ unn Kinner aangelòò, dòò käm jedz e Veeschelsche raus. Mid bissje Gligg waa dann e Charagderkobb uff em Bild, meischdens in rá weiser Hill zum Uff- unn, wem’má sisch genuch bewunnerd had, widder Zuklabbe. E Passbild degeje is radz-fadz gang. Desweje had má ach gesaad: Wenn de aanfangschd, deinem Passbild ähnlisch se siehn, geh vòrsischdshalwer bei de Dogder.
Dòòbei falld má bei Fodo dòò owwe in. Mach dá mòl e Bild? Nidd needisch, má hann’s jòò schunn. Awwer sinn Se bidde so gudd unn mache Se sisch e Bild, wie ald isch bin. Unn? Nää, bidde, behalle Se’s forr sisch; isch will nidd de ledschde Reschd vun Illusjone váliere. Wisse meeschd isch: Siehn isch aus wie 200? E groosi saalännischi Ladekedd scheind das se glawe. Uff me Bladd in meim Briefkaschde had groos gestann: Wir sagen Danke für 190 Jahre Treue und Vertrauen! Jedz mach dá mòò e Bild, hann isch gedenkt, die werre disch nòò deinem Zeidungsfodo geschädzd hann, sunschd hann se jòò känns. In Wòhrhääd wääs isch nadiirlisch: Má soll sisch geschmeischeld fihle, nòò z.B. bloos 40 Jòhr als Kunde Dank forr 190 se krien unn dann stadd forr 40 forr 190 Euro kaafe. Mid demm Zeidungsfodo hann isch sowieso längschd mei Friede gemachd: Je älder disch heid Bilder mache, umso ehjer saan die Leid in zehn Jòhr: Má sidd gaanidd, dass de älder worr bischd. Mach dá mòl e Bild!
